Signerer for to nye år

FOTBALL: – Me har ikkje signert enno, men kjem til å bli samde, seier David Nielsen.

Han tok over som trenar for Nest-Sotra i andredivisjon i sommar, og tek sikte på å bli der i minst to år til.

– Det er ein god spelarstall, go ein utruleg godt organisert klubb. Ein stad der det er mogeleg å få til ting, seier Nielsen.

Han har som mål nummer ein å få etablert Nest som ein solid 2. divisjonsklubb, men utelukkar ikkje ambisjonar om å koma eit hakk opp på lengre sikt.

– Det er utruleg mange talentfulle spelarar på Sotra, og eg ønskjer å gje dei sjansen til å spela i andredivisjon. I denne divisjonen har mange lag ein veldig spelande filosofi, som minnar om slik ein spelar ute i Europa. Det gjeld kanskje meir for 2. divisjon enn for dei to divisjonane over, seier han.

No har Nest-Sotra sikra seg Tor-Mattis Klåven. Han kjem frå Notodden, men har også vore i Løv-Ham og Alta i 1. divisjon.

– Han er ein veldig god spelar, og eg hadde eigentleg trudd at me ikkje skulle få tak i han, seier Nielsen.

Trenaren har planar om å vera ferdig med spelarkabalen om nokre få veker.

– Me har eit komplisert spelesystem som me skal læra oss, og det tek tid. Difor vil eg ha ting tidleg på plass, seier David Nielsen.