NM-kvalifisert med den råaste bilen

Med stereoanlegg, brushaldar, speglar og vimpel var Alexander Tømmerstrand i ein klasse for seg i helga. Han var med i konkurransen på Eikås motorsportsenter for å prøve å kvalifisere seg til årets NM i olabil i august.

Pokalar og medaljar
– Han hadde berre øvelseskøyrd i ein time før løpet, men klarte likevel å kome på tredjeplass i konkurransen om å ha beste tid. Det beste var sjølvsagt at han fekk første plass i konkurransen om å ha den råaste bilen, seier ei stolt mor, Monica Tømmerstrand.

For desse prestasjonane fekk Alexander både pokalar og medalje, og ikkje minst ein stor, fjernstyrt bil som einkvar bilførar ville blitt misunneleg på.

Det er 26 stadar i landet som arrangerer kvalifiseringsrunde til NM i olabil. Totalt blir det 56 deltakarar i noregsmeisterskapen som blir arrangert i Bø i Telemark ti dagar før Alexander fyller åtte år.

Ser fram til finalen
Olabil er ein hobby som engasjerer både barn og vaksne. Bilen til Alexander, Lynvingen, er i hovusak bygd av sjåførens stefar.

– Vi såg berre tilfeldig ein plakat om dette, og så bestemte vi oss for å delta. Alexander likte det kjempegodt, fortel mamma Monica.

Arrangementet på Eikås motorsportsenter får mykje skryt av Monica, og no gler både ho og Lynvingensjåfør Alexander seg til den store NM-finalen i Sommarland i Bø. Finalistane får gratis inngang i Sommarland, og opphaldet blir også sponsa. Så spørs det då om Alexander når heilt til topps mot dei 25 råaste bilane frå resten av landet.