Handplukka av Landro

Den siste veka har dei seks vore oppe til eksamen. På Landsskyttarstemnet på Voss. Med litt vekslande hell.

Torbjørn Landro gjorde eit liknande stunt på Ulven i 2002, og tykte det var såpass interessant at han gjerne ville prøve på nytt ti år seinare.

– Rett skal vera rett: To av dei som var med på skyteskulen min i forkant av 2002-stemnet, Arne Landro og Kåre Bjorøy, var også med denne gongen. Men dei har ikkje skote i mellomtida, og var ikkje vanskeleg å katalogisera som ferskingar også denne våren, fortel læremeister Torbjørn Landro.

Gode resultat

Torbjørn Landro sjølv er ikkje fersk. Han deltar på sitt landsstemne nummer 30 på rad, og er alltid like entusiastisk på skytesporten og Sartor skyttarlag sine vegne.

– Det var ingen tvil om at her hadde eg ein stor jobb å gjera. Lars Erik Løvaas hadde til dømes ikkje sett inn i eit dioptersikte tidlegare. Men du verda kor kjekt det har vore, seier læremeister Landro.

Og skal vi tru resultatlistene i klasse 1, står det stor respekt av den jobben han har gjort. Mange av skyttarane hans plasserte seg høgt på listene. Arne Landro og Edgar Bjorøy skaut glimrande på bane, og noterte seg for høvesvis 243 og 241 poeng.

Sende SMS

Men den nyvunne skytedugleiken skapte også eit visst overmot hos nokon i gjengen.

– Ein – utan at vi skal nemne namn – ville visa kona kor god han var blitt, og lova å skyta ein einar på første prøveskotet. Det klarte han. Problemet var berre at etter to prøveskot kilte Saueren seg, og han fekk ikkje ut eit einaste konkurranseskot, fortel Landro, til muntre tilrop frå den vaksne elevflokken.

Og det stoppa ikkje der:

– Ein annan som skaut veldig bra på dei første 15 skota, var så nøgd med eigen innsats at han sende SMS til folka på utsida, og lurte på om dei fekk med seg det som skjedde. I staden for å skyte nye prøveskot. Og då gjekk det ikkje like bra på dei ti siste, røpar røynde Landro.

Rett i sanden

Ein i gjengen kan også smykka seg med å ha levert det raskaste skotet på felthurtigskytinga.

– Problemet var berre at det blei fyrt av på veg ned i posisjon, og gjekk sjølvsagt rett i sanden framfor han, smiler klasse 4-skyttaren som har bygd for mange hytter den siste tida, til at han sjølv klarar å hevda seg heilt i toppen i LS-samanheng.

Men så hadde han også andre og viktigare oppgåver å tenkje på under opphaldet på Voss.