Ein skarp familie

BILDØY: Slekta har hatt fire skyttarar i aksjon i årets Sartor Cup: Malvin (67), Magnus (15) og Ole Kristian (9) har slått følgje med skyttaresset John Olav Ågotnes. I kvar sin klasse siktar dei målretta mot blinken. Og treff oftast godt.

– Eg var ikkje på John Olav sitt nivå då eg var yngre. Det er først etter at eg vart gamal at eg byrja å skyta seriøst, fortel Malvin Ågotnes. Han omtalar sonen John Olav som ein langt sterkare skyttar. Og John Olav, som er tidlegare skyttarkonge, er den som så langt har nådd lengst i slekta. Kor han enn skyt, er han stort sett å finna langt oppe på resultatlistene.

– Eg skyt 6000-7000 skot i året, i tillegg til rundt 10.000 skot med miniatyr, fortel han.

Tre i finalen
Sonen Magnus følgjer tett i skytespora, han kan skilta med ein femteplass i landsskyttarstemnet. Yngstemann Ole Kristian har skote i eit år, og har vist seg fram under Sartor Cup på Bildøy. Laurdag var det finalerunde. Der var Ole Kristian for ung til å delta, men dei tre andre Ågotnesane var alle i finalane. Malvin fyrte av til gull i klasse V65 og Magnus kom på femteplass i si klasse. Så var det klart for John Olav i klasse 5.

– Det var ei spanande finale, seier John Olav etter å ha kome på tredjeplass.

Bomma på ståande
Birgit Rønningen frå Spjeld såg lenge ut til å ha gullet i lomma. Ho skaut klart betre enn John Olav Ågotnes og dei andre på liggjande. Også på sitjande gjekk det bra med Rønningen, som skyt for Åsane/Hordvik. Men på ståande gjekk det skeis, med spesielt eitt skot som på dette nivået nærast er å rekna for bom. Demed vart det siger til Arild Røyseth (Åsane/Hordvik) og eitt skots omskyting om sølvet mellom Rønningen og Ågotnes. Den kampen vann Rønningen med eitt tidels poeng.

Les meir i papiravisa tysdag