Vil vedta mindre helikopterstøy

Under eit folkemøte om støyproblema måndag kveld kom leiinga på Flesland og helikopterselskapa med løfte om ti tiltak som skal vera med og redusera støyproblema. Dei viktigaste er at helikoptra frå slutten av april skal redusera farten og auka høgda dei flyg i. Ordførarane med fjellordførar Jan Utkilen i spissen tykkjer tiltaka er gode, men ikkje tilstrekkelege.

– Me vil gjennom politiske vedtak og lovverk pressa fram endringar som reduserer støyen for innbyggarane i regionen, seier Utkilen. Han meiner slik støy over tettbygde strøk aldri ville blitt godteke i Bergen. Viss ikkje støyen frå helikoptra vert mindre, meiner ordførarane at sentrale styresmakter må tvinga selskapa over på andre maskiner.

Langdrygt møte
Under folkemøtet på Liljevatnet skule brukte representantar frå Avinor, lufthamna på Flesland og helikopterselskapa nær to timar på å presentera seg. Forsamlinga på kring 100 frammøtte i salen vart meir og meir amper til meir dei fekk høyra om stiftingsår, aksjekapital og vekstprognosar. Då flygeleiar Per Elvebakk gjekk gjennom alle flygeruter for visuell flyging og flyging på instrument vart det nok for mange.

Folk ville vita kvifor dei stadig vekk har støyande helikopter tett over hustaka sine tidleg og seint, trass i at husa ikkje ligg under flygetraseane som vart oppgjevne. Til slutt måtte møteleiar og initiativtakar Albrigt Sangolt gripa inn og få tryggleikssjef Rune Johanson på Flesland til å legga fram dei ti tiltaka mot støy frå Sikorsky-maskinene. Ein ting var Johanson, resten av panelet og forsamlinga nemleg samd om. Årsaka til auka støyproblem må vera den nye maskina Sikorsky S-92.

Verre støyoppleving
– Me har fått stadig fleire klager på at helikoptra flyg meir enn før, men realiteten er at trafikken har gått ned dei siste åra, hevda Johanson.

Rett nok gjekk trafikken opp att frå 2004 til 2005, men berre med eit par flygingar for dagen.

– Då må det vera noko med helikotertypen som gjer at ein opplever det som om trafikken har auka. Forklaringa må vera S-92, meiner tryggleikssjefen.

Sjefflygar Arne Martin Gilberg hjå Norsk Helikopter forklarte at S-92 er fysisk større og tyngre og slik legg større last på rotoren. Blada må jobba hardare og støyar dermed meir.

– Lydbølgjene skapar vibrasjonar som gjer at husa på bakken ristar, sa Gilberg.

Ein humrande forsamling fekk også høyra at ei større maskin reint visuelt virkar nærare.

– Det ser ut som me flyg lågare, men det gjer me ikkje, hevda sjefflygaren.

Uakseptabelt for Haganes
No skal i alle fall helikoptra flyga høgare, men ordførarane er altså ikkje nøgd med berre dei lovde tiltaka.

– Me må gje tiltaka ein sjanse, men jobbar samstundes vidare med saka. Når me denne kvelden fekk høyra at det på Bjorøy er målt 70 desibel i eit hus under overflyging, må me berre tinga støymåling på bakkenivå så fort som råd, seier Jan Utkilen.

Han likar heller ikkje tiltaket som går på å gje område som Haganes meir av ulempa med flygingsrutene, slik at andre vert spart.

– Det er ikkje ei løysing me kan leva med, meiner Utkilen.


Les meir om saka i papir- eller PDF-avisa