Teppet opp for Jakob Sande

Kultur: Då skal replikkane sitja, kostymane skal vera på plass, bandet skal vera finstemt og koret vil vera parat til å møta publikum i kultursalen på Straume. I korrekkjene har det blit jobba svært lenge mot premierekvelden i morgon.
– Eg er ikkje heilt nedpå, vedgår prosjektleiar Erik Espedal. Som alltid er ikkje alt like trygt på plass som det prosjektleiaren skulle ynskja.
– Vi er alltid nervøs for om vi kjem i mål, men vi kjem alltid i mål. No har vi intense prøver på scena, bandet er med, og i kveld er det generalprøve, seier Espedal.

«Det kveldar på Kobbeskjer» er namnet på den to timer lange førestillinga. Det er Torild Fjeldstad frå Øygarden som har sett Sandesongane saman til ei førestilling, med både song, dikt og skodespel.
Jakob Sande har vore tema i Fjellkoret i snart eitt år. Koret tek ikkje lett på det når dei lagar i stand prosjekt. Med ei kostnadsramme på mellom 250.000 og 300.000 kroner er det heller ikkje likegyldig om publikum dukkar opp eller ikkje.
– Vi har snart seld halvparten av det vi ynskjer å selja. Dermed har førehandssalet vore bra, synes Espedal.
Med daglege øvingar dei siste vekene har det ikkje akkurat vore ei familievenleg tid for kormedlemmane.

Seks førestillingar fordelt på to helgar gjer at korsongarane nok blir mykje heimefrå også i dagane framover.
– Dei fleste av oss har sommarfuglar i magen no. Vi som har sydd det heile saman har kanskje ekstra mange, fordi vi er spente på heile arrangementet, seier Erik Espedal. Han trur Sotrapublikummet vil få seg fleire øverraskingar i løpet av kvelden.
— Vi har vald å syna spennvidda i Jakob Sande sine tekstar. Mange trur nok dei kjem til å le av alt, men han har også ei seriøs side. Jakob Sande vert ikkje mindre interessant for det, synes Erik Espedal.