Song Sande for stappfulle hus

– Vi er heilt overvelda. Dette har vore den største suksessen Fjellkoret nokongong har hatt.
Det seier prosjektleiar Eirik Espedal i Fjellkoret.

Bortsett frå nokre få ledige stolar på premieren, har det vore stappfullt i Kulturhuset på Straume på samtlege seks førestillingar.

Koret fekk lov å ta inn 20 ekstra stolar på dei tre siste førestillingane no i helga, fordi ein merka pågangen. Siste kvelden var trengselen så stor at fleire enn ti personar måtte avvisast i døra.
Totalt har det vorte selt rundt 1.600 billettar. Økonomisk tyder det eit lite pluss.

Viktig med lokalt kulturliv

Eirik Espedal trur Jakob Sande og Fjellkoret kan dela æra for at det har gått så bra.
– Vi vart overraska over at denne førestillinga hadde ein slik enorm appell. Det seier mykje om Jakob Sande, og samstundes klarar vi å gjera det på ein god måte, seier han.

Han meiner førestillinga syner at Fjellkoret har eit svært trufast publikum.
– Eg reknar med at 90 prosent av dei som såg oss, kjem her frå distriktet. Vi er svært glade og takksame for at vi har eit slikt publikum, konstaterer han.

Espedal trur heller ikkje at alle dei som såg førestillinga, automatisk hadde reist på noko tilsvarande i Bergen.

– Dette syner kor viktig det er at vi kan laga slike førestillingar ute i distrikta. Det tyder også at fleire her kan ta del i det og ha glede av det.

For dei som ikkje fekk med seg førestillinga, er siste toget mest truleg godt. Då Fjellkoret sette opp Johannes Kleppevik kabaret for nokre år sidan, vart det fleire førestillingar enn planlagt.

– No har vi med profesjonelle musikarar som ikkje har tid til å vera med vidare. I tillegg er Kultursalen oppteken med andre ting. Dermed er det ikkje så lett, seier Espedal.
I tillegg vert det ikkje alltid det same å freista å setja ein suksess oppatt på nytt.

Dreg til Sverige

Han legg ikkje skjul på at ein slik suksess gjer at koret kan våga å satsa friskt fleire gonger. Men aller først skal koret planleggja ein Stockholm-tur i juni.
– No har koret teke seg ein velfortent og lang ferie til over påske. Akkurat no er vi slitne, men voldsomt glade, seier han.