Solosong som smeltar

Fjellkorets samproduksjon med Rong brass og Lousiana Washboard Five vart framført for ei fullsatt Foldnes kyrkje laurdag. Søndag gjentok dei suksessen i Johanneskirken i Bergen. Mellom glade jazztonar stakk Alis Pfeiffers framføring av Duke Ellington-balladen «Come Sunday» seg fram. Sjølv var ho mest letta når premiera i Foldnes kyrkje var over.

Sydde saman på ein dag
- Dette var ein stor opptur, seier ein nøgd Alis Pfeiffer.
Saman med resten av Fjellkoret, møtte ho ikkje bandet Lousiana Washboard Five og Rong brass før tidleg laurdag.

- Me har sydd saman heile konserten i dag. Fram til no har me berre øvd kvar for oss, seier Pfeiffer.

Ho er nøgd med resultatet. Sjeldan har Foldnes kyrkje vore rysta av så glade New Orleans-inspirerte tonar som laurdag kveld. «The Gospeltrain», «Old Time Religion», «Joshua Fit the Battle of Jerico» og «Oh When the Saints».

- Det var mykje glad musikk heile vegen. Fullt køyr og veldig kjekt, oppsummerar Alis Pfeiffer som sjølv stod for kveldens rolegaste nummer med «Come Sunday».

Improvisasjon og sprell
Men typisk nok, jazzmusikarar er ikkje alltid til å stola på.

- Lousina Washboard Five gjorde ein del uvande ting. Litt improvisasjon og slikt som me ikkje hadde venta oss. Men det er berre artig, seier Pfeiffer.

Som i dei fleste blanda kor, er damene i fleirtal. Slik er det også i Fjellkoret, og då konserten nærma seg slutten var det berre damer som hadde sunge solo. Heilt til Erik Espedal tok av med dansing og synging.

- Eg måtte jo gjera avslutninga litt ekstra bra, gliser Espedal.
At han var den einaste mannen som song solo, kom han på rett før han skulle synga.

- Då måtte eg jo gi jernet og redda æra for menna i koret.

Imponert over koret
Dirigent for Fjellkoret og musikar i Lousiana Washboard Five, Steinar Sætre, tykkjer konserten var fantastisk.

- Koret var fantastisk, Rong brass var bra og alt stemte, seier Sætre.

Han er særleg imponert over kor mykje koret har fått til på kort tid.

- Det krev mykje å få ei slik kjensle med musikken som koret har gjort. Dei imponerer meg, seier Sætre.

På repertoaret i konserten stod flest opptempo jazzmelodiar og nokre rolegare songar.

- At me har så mange varierte vokalistar gjer at me taklar ulik type musikk. Det er ei styrke for koret, meiner Sætre.