Ny bølgjekraftteknologi: Satsar på Toftestallen

- Me meiner dette bølgjekraftverket vil tole vinterstormane. Det skal me også få svar på dette året, seier Ingvald Straume, ein av dei fire gründerane bak den nye bølgjekraftteknologien.

Denne teknologien baserer seg på å ri bølgjene. Den nye installasjonen er ein kombinasjon av flytebøyer og installasjon på havbotnen, til skilnad frå dei havarerte landbaserte bølgjekraftverka i Toftestallen i Øygarden.

- Gjennom stipendmidlar har me fått råd til å byggje ein prototyp som me no skal teste ut over eit år, seier Ingvald Straume.

Først i verda

Straume er ungdomsskulelærar og har utvikla ideen og bølgjekraftteknologien saman med tre sivilingeniørar.

- Målet vårt er å verte det første selskapet i verda som etablerer bølgjekraft som ei kommersielt interessant energikjelde, proklamerer Straume.

For å få dette til, må dei dokumentere at det går an å utnytte bølgjekraftteknologi på lik line med vindkraft. Denne veka har Straume saman med familien vore i full sving på Geitanger for å setje ut den første prototypen av bølgjekraftverket, her skal det testast i eitt år.

Prøveår

- Når me plasserer det på Geitanger dette første året, er det fordi det her er lettare tilgjengeleg, me har betre tilsyn og kontroll, seier Straume som har familie med hytte på øya i Hjeltefjorden.

Å plassere bølgjekraftverket inne i Hjeltefjorden kan få einkvar til å stusse. Dei fire gründarane samanliknar det også sjølv med å plassere eit vindkraftanlegg i eit skogholt.

Likevel, Hjeltefjorden har gode bølgjeforhold når det bles frå nord. I løpet av året ønskjer dei å vise at anlegget toler møtet med sjøen, både i form av rust og kraft, i tillegg til å samle dokumentasjon og forske vidare. Det er først neste sommar teknologien skal prøvast ut i det opne havet, slik at ein kan utnytte bølgjene når dei kjem frå alle retningar.

Investorjakt

Sjølve testprøva for den nye bølgjekraftteknologien vert vinteren 2007. Då er tanken å setje anlegget ut i havet utanfor Toftestallen, utanfor ruinane av det tidlegare bølgjekrafteksperimentet.

- Valet av denne plassen er fordi det her er gode bølgjeforhold. Samstundes er det ei symbolsk side, ettersom det var her Kværner og Norwave mislukkast med sitt prosjekt, forklarar Straume.

Nettopp dei tidlegare mislukka bølgjekrafteventyra har gjort det vanskeleg for dei fire gründerane. Skal dei setje ut eit anlegg utanfor Toftestallen neste år, må dei ha investorar. Problemet er at dei tidlegare eksperimenta ikkje har vore lønnsame.

- Me er på investorjakt no. Klarer me å dokumentere at bølgjekraftteknologien vår fungerer same staden som dei andre mislukkast, viser me at teknologien held. På den måten håpar me at prosjektet vert meir interessant for større investorar, seier Ingvald Straume.