Alt-slave for operaen

Fjell gard: – Det er ikkje ofte eg planlegg så langt fram i tid. eg brukar å ta det meir spontant, flirer Linda Thommasen Fjell.
Ho har allereie booka seg inn på hotell i hovudstaden for fire dagar i april neste år. Ho fekk klar melding om at hotellrommet bør ordnast med det same.
Linda Thommasen Fjell skal nemleg vere stemma som representerer Fjell i Slavekoret i opningskvelden for operahuset.
Frå Fjell ønskte Slavekoret ei alt-stemme. Oppmodinga gjekk til Fjellkoret for å finne ei passande stemme, og det vart Linda Fjell. Ho har vore medlem i atten år i Fjellkoret, men fekk plassen på loddtrekning mellom dei som hadde lyst til å reise.
Slavekoret vert sett saman av ei stemme frå kvar kommune i heile landet, pluss profesjonelle operasongarar. Det er Bosch Rexroth, ein av leverandørane til hovudscena på Operaen, som har teke initiativet til Slavekoret, som ein av leverandørane som «slavar» for å få operaen ferdig i tide.
Koret skal leiast av Per Oddvar Hildre, som er dirigent for koret SKRUK, akkompagnert av Ytre Suløens Jazzensemble.
Om vel eit år skal Linda Fjell møte dei andre koristane frå vestlandet til seminarhelg og øving i Bergen. Deretter får dei ein cd til å øve seg kvar for seg heime, før dei møtest att til fellesøving for heile koret dei siste intense dagane før opningskvelden.
– Det vert spanande å vere med å synge i eit kor med så mange stemmer. Og i eit stort nasjonalt bygg som kun er bygd for musikk, seier Linda Fjell.
Ho vert ein av dei første til å opptre i landets nye musikksal. Kanskje med kongen på første rad. Kanskje på fest med fiffen etterpå.
Linda Fjell har tru på at operahuset også vil verte brukt til fleire meir moderne operaopsetningar. Sjølv har ho ikkje vore på opera før, ho har heller sett moderne musikalar. Både som publikum og som utøvar. Etter atten år i Fjellkoret er det ikkje få musikalar ho har vore med på.
– Det vert spanande å sjå profesjonelle utøvarar i sving. Særleg å jobbe med profesjonelle dirigentar.
Ho er nemleg sjølv i gang med dirigentutdanning. I første omgang gjennom Korforbundet. kanskje vil ho ta utdanninga vidare på høgskulenivå.
Før jul hadde Linda Fjell praksis i sitt heimlege Fjellkor.
Her fekk ho lære av dirigenten i Fjellkoret, Steinar Sætre, som til dagleg er tilsett i Griegakademiet. I to år har han dirigert Fjellkoret.
– Steinar Sætre kasta meg rett ut i det. I desember dirigerte eg halve julekonserten. Det var skummelt, men det gjekk, smiler alt-stemma.
Sjølv har ho ein draum om å starte sitt eige kor i Fjell.
– Eg kunne tenke meg å starte eit eige kor som var litt meir klassisk orientert enn det Fjellkoret er, innrømmer ho.
Ho trur det er ein del yngre folk som kan vere interessert i å synge klassisk. Koret treng ikkje vere så stort, synest ho. Sikkert og visst, vert koret ikkje like stort som Slavekoret i operahuset.