Vil ikkje bidra på Toftestallen

Miljøminister Erik Solheim (SV) viser til at ruinane neppe er særleg forureinande anna enn reint visuelt, og vil difor ikkje bidra med statlege midlar til opprydding.

Det er stortingsrepresentant Arne Sortevik (Frp) som har prøvd å få regjeringa på bana for å fjerna dei øydelagte bølgjekraftverka på Toftestallen. Først svarte Solheim at kommunen kunne påleggja utbyggjar å ta seg av ruinane. Men selskapet Norwave, som står bak bølgjekraftverket som ruva mest i landskapet, er konkurs. Difor er det vanskeleg for Øygarden kommune å finna nokon å stilla ansvarleg. Sortevik spelar difor ballen tilbake til staten.

– Av di bølgjekraftverka var pionérprosjekt innan det viktige området fornybar energi, meiner eg at staten bør vurdera å bidra i oppryddinga, seier Frp-politikaren.

Difor sendte han eit nytt brev til Erik Solheim, der han ber om at staten hjelper til. Miljøministeren viser til at staten i enkelte tilfelle bidreg der grunn eller sjøbunn er forureina av miljøgifter, og der det ikkje er mogeleg å finna ein ansvarleg. På Toftestallen er det i liten grad miljøforgifting, men heller skjemmande forsøpling, som er problemet. «Det er difor ikkje grunnlag for eit initiativ frå mi side i denne saka» skriv Erik Solheim i svarbrevet.

Arne Sortevik reagerer på avslaget.

– Staten sit med så mykje pengar at dei burde ta seg råd til å hjelpa til, seier han.

Bølgjekraftruinane er lett synlege i området, og har stått til forfalls i nærare tre tiår. Erik Solheim viser til at Øygarden kommune kan rydda opp, om dei meiner det er naudsynt. Men som Vestnytt tidlegare har skrive, er politikarane i Øygarden ikkje veldig motiverte til å bruka pengar på opprydding på Toftestallen.al