Vil ha tannlækjaren attende i Øygarden

HELLESØY: På den lokale butikken har folk skrive under på at ein vil ha attende tannlækjartilbodet i kommunen. Synnøve Hellesøy, som har sett i gang kampanjen, har ei von om at Øygarden ein dag skal få ein tannlækjar å gå til.

– Vil ikkje køyra så langt
I dag køyrer Synnøve Hellesøy til Ågotnes med borna når dei skal til den ålmente tannhelsetenesta.

– Alt ligg til rette for ein tannlækjar på Rong. Lokala står tomme og ventar på nokon, seier Synnøve som ikkje vil gje seg på at kommunen fortener å ha eit slikt tilbod.

– Eg må køyra sju kilometer fram og attende for å få borna mine til tannlækjaren. Det er ikkje godt nok, seier Hellesøy indignert.

Ho har sendt skriv til kommunen, men kommunen kan ikkje gjera så mykje med saka.

– Førebels kjempar eg åleine, men eg skal nok få med meg fleire, seier Hellesøy.

Ho har i tillegg starta opp ei Facebook-side der ho kjempar for same sak.

– Eg skal gjera mitt beste i ein månad, så får me sjå kor langt eg er komen, seier Synnnøve Hellesøy.

Ho tykkjer folk er tiltakslause, som ikkje engasjerer seg i slike saker.

– Det er ingen krise dette, men me treng ein tannlækjar i Øygarden, seier Synnøve Hellesøy.

Sørga for stø teneste
Overtannlækjar Torunn Gaarden for tannhelsedistrikt vest, er krystallklår på kvifor tenestetilbodet vart flytta frå Rong til Ågotnes.

– Alle skal ha eit tilbod om ålment tannhelseteneste, og det hadde ikkje innbyggarane i Øygarden når tenestetilbodet låg der, seier Gaarden til Vestnytt.

Den ålmente tannhelsetenesta vart flytta frå Rong til Ågotnes i juni i fjor. Sidan då har det ikkje vore problem for Øygards-folket å koma til.

– Dette er eit typisk distriktsproblem. Me fekk rett og slett ikkje folk til å vera i Øygarden. Min jobb er å skaffa bebuarane eit stabilt tilbod. Det får dei no på Ågotnes, seier overtannlækjaren.

Ho legg til at då tannlækjaren var på Rong, var det berre dei som budde i nærleiken som slapp å ty til bil.

– Alle andre måtte bruka bilen, og det eksisterer ordningar gjennom trygden som refunderer urimelege skyssutgifter i høve til tannhelselova, seier Gaarden.