Vegnettet i Fjell treng massiv opprusting

Frå 1991 til 2010 blei det registrert 595 trafikkulukker i Fjell kommune. 26 personar mista livet i denne perioden, og 874 personar vart skadde. Når Fjell kommune utarbeider trafikksikringsplan, er visjonen «null ulukker».

På tysdag la komité for drift planen ut på høyring i seks veker.

Stort engasjement

Det er sjølvsagt ikkje berre dårlege vegar og manglande sikringstiltak som er årsaka til ulukker. Difor omhandlar også trafikksikringsplanen tema som haldningsskapande arbeid. Men når innbyggjarane i Fjell har sendt inn 200 forslag til planen, er det dei fysiske tiltaka folk er opptekne av.

– Sjølv om det ikkje finst midlar til å gjennomføra alle tiltaka, meiner Statens vegvesen at det er viktig å synleggjera behovet, seier Marit Selberg Sigurdson hos plan- og utbyggingssjefen i Fjell.

Enorm folkevekst

Fjell kommune har gått gjennom ein enorm folkevekst og vekst i talet på arbeidsplassar dei siste tiåra.

– Vi har eit vegsystem som ikkje er dimensjonert for 22.000 innbyggjarar, konstaterte eigedomssjef Atle Justad (bildet) då han gjekk gjennom restansane frå førre plan med politikarane tysdag kveld.

– Ikkje alt er gjennomført frå den planen, men vi har ei lang skryteliste også, understreka Justad.

I tiltakslista som blir presentert i Vestnytt i dag, er ikkje alle tiltaka som står att frå den gamle planen med.

– Dei tiltaka må synleggjerast også i den nye planen. Elles er eg redd dei kokar bort i kålen, understreka Gunnar Hannisdal (Ap). Dette er det politisk semje om at skal gjerast.

Bør spissa ønska sine

– Dei to farlegaste fylkesvegane vi har, er Arefjordvegen og vegen frå Bildøybakken til Liaskjæret, meiner Atle Justad.

Tiltak på fylkeskommunale vegar er det i utgangspunktet ikkje kommunen som skal finansiera. Difor meiner eigedomssjefen at det er klokt om politikarane spissar ønska sine og legg full tyngde der det trengst aller mest.

Fjell kommune set årleg av tre millionar kroner til trafikksikring. I tillegg finst det eigne postar i budsjettet til rehabilitering av vegar og til sikring av skulevegar. Ser vi på økonomiplanen for 2013, er det likevel sett av berre 7,5 millionar kroner totalt. Dermed seier det seg sjølv at det er begrensa kor mykje som i realiteten kan gjennomførast.

Har ikkje prioritert tiltaka

Planen og tiltakslista blir no lagt ut til høyring utan at politikarane har gjort sine prioriteringar. Tiltakslista som blir presentert, er forslaget frå arbeidsgruppa, men heller ikkje her er tiltaka i dei ulike gruppene prioritert innbyrdes. Det er difor tilfeldig kva som står øverst og nederst i A-gruppene (sjå liste).

Dersom ein har forslag til tiltak som bør gjerast og ikkje alt har kome med innspel til trafikksikringsplanen, er tida no inne for å skriva eit brev.

Det er kommunestyret som til sist skal vedta trafikksikringsplanen.

I papiravisa 30.august finn du oversikt over forslag til prioritering av strakstilstak på kommunale vegar i Fjell.