Uro for barna på Glesnes

GLESNES: KrF-politikaren har blitt kontakta av urolege foreldre på Glesnes. I Vestnytt 30. oktober sa Rune Samsonsen i driftsavdelinga til kommunen at lektene på taket til Glesnes skule er ròtne.

– I sterk vind kan dette medføra at skifer ramlar ned, skriv Beate Husa i ein interpellasjon til kommunestyret i dag.

Stiller spørsmål
Samsonsen viste også til eit tilfelle for nokre år sidan då skuleplassen blei stengt på grunn av sterk vind.

– Dette gir grunn til stor bekymring, meiner Beate Husa.

Ho vil difor ha svar på kva som er gjort for å kartleggja problemet. Ho ønskjer også ei oversikt over kor ofte stenging av skuleplassen har blitt diskutert dei siste åra.

– Kven vurderer vindforholda, og kva rutinar føreligg dersom ein meiner vinden er så sterk at det er farleg å ferdast på plassen? spør ho ordføraren.

Bekymra foreldre
Husa lurer vidare på om det er laga ein tidsplan for når taket kan utbetrast.

– Eg har blitt kontakta av bekymra foreldre. Vi kan ikkje ha ein situasjon der barna er i fare, avsluttar Beate Husa.

Same dagen som det blei halde synfaring på skuleplassen i samband med trafikksikringsprosjektet som er planlagt ved skulen, skreiv FAU-representant May Britt Hevrøy til ordføraren.

– Dette er ein svært alvorleg situasjon vi ikkje kan leva med, skriv ho om faren for at det ramlar ned takstein.

– Såvidt eg forstår på ungane har det også kome vatn inn i klasseromma, held ho fram.

Midlertidig sikring
Rune Samsonsen opplyser at det i slutten av sist veke blei sett opp eit gjerde om lag to meter utanfor veggen rundt heile skulen. Det er planlagt at eit firma kjem til skulen i dag for å montera eit sikringsbord på taket like ovanfor takrenna.

– Så dersom det løsnar stein som deretter sig nedover taket, vil han bli stoppa av dette bordet, seier Samsonsen.

Kommunen har dermed gjort det som kan gjerast av midlertidig sikring.

– Eg trur ikkje stein vil blåsa av taket, men ein kan jo aldri vita, meiner Samsonsen.

Har sett av pengar
Det er ikkje laga noko komplett tilstandsrapport, men folk frå driftsavdelinga har sjølv vore oppe og sett på taket.

– No ser det også ut til at det blir sett av pengar til prosjektet, seier Samsonsen.

I framlegget til investeringsbudsjett for neste år har formannskapet sett av 1,2 million kroner til å skifta taket på skulen.

– Det er førebels ikkje klart kva tid arbeidet kan byrja. Men dersom pengane blir løyvde, blir taket skifta til neste år, seier Rune Samsonsen.