Tok «sjufjellstur» på asfalt

RONG: – Det var eit innfall vi fekk då årets Sjufjellstur blei arrangert i Bergen, fortel ein av initiativtakarane til turen, Renate Sæle. Ni personar frå Øygarden deltok på marsjen frå den blå steinen på Torgalmenningen i Bergen til Rong senter i Øygarden.

– Vi ville arrangera ein tur for oss som ikkje er så glade i å gå i fjellet, bli våte på beina og skremt av sauer, seier Renate.

Lengre enn eit maraton
Ifølgje gule sider er distansen på omtrent 41 kilometer, men det er langs motorveg og gjennom tunnelar. Det er vesentleg lengre å gå til fots.

– Den andre grunnen til at vi går, er at ein kamerat av oss, Espen Rong, blei utfordra til å gjera det same for ei tid tilbake. Han gjekk på 10,5 timar, og målet er å gå raskare enn han, sa Renate før turen.

Vestnytt møter fem av vandrarane like før dei skal starta på Bildøybakken og gå opp til Kolltveitskiftet. Dei har gått i fire timar, men ingen klagar så langt.

– Men vi begynner å kjenna det, vedgår Kine Oen.

– Du har ikkje vondt viss du ikkje vil ha vondt, seier Sarah i mistenkeleg militær tone.

Pengar til Kreftforeningen
Faren til Kine, Jostein Oen, er den eldste i følgjet.

– Men han har sprunge heile vegen, så han er sikkert snart framme, trur Renate. Like bak Jostein i løypa ligg May Therese Rong, og bak henne igjen går Linda og Thomas Oen.

Gjengen som ligg sist i løypa har nettopp tatt seg ein matbit på Straume.

– Nokon hadde niste med seg, andre gjekk på Mix. Men det blei baguette, ikkje burgar, forsikrar Renate.

Samtlege ser ut til å vera godt utstyrt til turen, med gode sko og sekk med drikke og proviant. For å gi turen eit visst poeng utover å slå tida til ein kompis, har vennegjengen alliert seg med Kreftforeningen.

– Vi har fått ein eigen KID som folk kan bruka om dei vil støtta Kreftforeningen gjennom denne turen. Og så har vi bøsse ved målområdet ved Rong senter, fortel Renate før vandrarane må vidare så dei ikkje stivnar totalt.

Berre éin måtte bryta
Etter endt tur er det klart at Jostein Oen fekk tida 4 timar og 42 minutt, med May Therese Rong like bak på 4 timar og 57 minutt.

– Christian, Åshild og eg kom inn sist, på 9,5 timar, fortel Kine. Renate måtte diverre bryta på grunn av eit kne som låste seg.

– Men alle som fullførte, gjekk raskare enn Espen Rong?

– Jau, men han gjekk fleire kilometer lengre, så det kan ikkje heilt samanliknast, vedgår Kine Oen.