Tettar seg til heider

– Med dette systemet vil ein kunna bora tryggare i lengre periodar utan stans, seier Gunnar Knutsen i Siem Wis på Straume.

Bedrifta har utvikla eit nytt system for å halda kontroll med trykket i boreslammet under boreoperasjonar. Det nyutvikla patentet har vorte testa på Gullfaks, med lovande resultat.

– Me har prøvekjørt innretninga med eit trykk på heile 207 bar, utan problem, fortel Knutsen.

Under oljeboring vil normalt trykket liggja på langt mindre.

Finalist

No merkar Siem Wis trykket også frå oljebransjen, med førespurnader frå heile verda om det nye patentet. Og her heime er dei nominert til DnB Nor sin innvoasjonspris, som ei av tre bedrifter i Hordaland, Sogn og Fjordane og Møre og Romsdal.

– Det er første gongen ei bedrift herfrå har vore nominert. Det er kjekt at Sotra får vist seg fram på denne måten, seier distriktsbanksjef Ellen Pamer.

Under oljeboring må ein ha trykk på boreslammet, mellom anna for å hindra utblåsingar og at brønnveggane kollapsar. Normalt brukar ein då ei innretning med ein pakning som roterer rundt med borestrengen. Ziem Wis sitt system har fire pakningar som ikkje roterer. Belastninga kan fordelast og justerast mellom dei fire pakningane, og alt blir nøye overvaka av sensorar.

– Dette gjev eit høgare tryggleiksnivå og meir forutsigbar drift, seier Jan Atle Andersen i Siem Wis, for tida på oljemessa i Houston.

Lokale leverandørar

Bedrifta har store forventningar knytt til det nye systemet. Siem Wis har 22 tilsette, og nær alt dei brukar av delar blir produsert lokalt. Til dømes blir gummipakningane laga hjå Bergen Plastics i Midtstegen i Sund. No kan Siem Wis bli den første Sotra-bedrifta som får DnB Nor-prisen. Regionfinalen for Vestlandet er 23. mai, så ventar eventuelt den nasjonale finalen. Siem Wis håpar at det og ventar kontraktar rundt omkring, etter det som har vore eit nitid og langvarig utviklingsarbeid.

– Me har brukt mykje tid og pengar på det, seier Per Espen Edvardsen i Siem Wis.

Systemet er utvikla for faste riggar, men ein skal og tilpassa det til flyteriggar.