Telavåg snusar på privatskule

TELAVÅG: – Vi ville lodda stemninga i bygda og høyra kva folk meinte om vedtaket, fortel Siri Anita Hagenes. Saman med Kine Baardsen kalla ho innbyggjarane i Telavåg inn til folkemøte onsdag kveld, i samband med at Sund kommune vil leggja ned fem av sju skular.

– Om lag 70 menneske møtte opp. Det kom folk også frå Pollen krins, og vi blei kontakta av fleire som støtta initiativet, men som ikkje hadde høve til å koma, seier Hagenes. Ho har sjølv ein son som skal opp i fjerdeklasse til hausten og to yngre barn som går i barnehage.

Å setja seg inn i lovverket og finna ut om det er mogleg å starta opp ein privatskule, er eit omfattande arbeid. Dei to mødrene ville difor vita om dei har støtte i bygda for å gå vidare.

– Konklusjonen er at det er stor interesse for å finna ut av desse spørsmåla. Vi har sett ned ei gruppe på fire-fem personar som skal jobba med det, opplyser Hagenes.

Ho har oppretta kontakt med blant andre May Britt Hevrøy på Glesnes.

– Vi vil gjerne samarbeida med dei på Glesnes, seier Hagenes.

Både Glesnes og Telavåg skular blir lagt ned om kommunestyret sitt vedtak blir ståande.

– Folk er utruleg skuffa. Hadde politikarane vedteke tre skular i staden for to, trur eg folk hadde akseptert det, seier Hagenes. Alternativet med tre skular innebar bygging av ny skule i Spildepollen for elevane på Glesnes, Telavåg og Pollen skular. No skal dei i staden går på Skogsvåg skule.

– Kvifor er de villige til å gå så langt?

– Elevane fortener ein skule i nærmiljøet sitt, meiner Siri Anita Hagenes.