Sund gjekk på kjempesmell i retten

 – Vi må no ta stilling til om vi skal anka eller ikkje, seier ordførar Albrigt Sangolt. Då er det i tilfelle snakk om å prøva å få saka opp i Høgsterett.
Viss avgjerda frå lagmannsretten blir ståande, er kommunen og Austefjorden Smolt sett langt tilbake i ei sak som har versert i årevis i Sund kommune.
Dagleg leiar Bernt Kåre Sangolt i Austefjorden Smolt ønskjer ikkje å kommentera saka i Vestnytt.

Ville betala mindre

Spørsmålet om erstatning til grunneigarane som må vika plass for Austefjorden Smolt i Kvernavika, blei tatt opp i tingretten i fjor. Austefjorden Smolt meinte erstatningssummen der blei sett for høgt. Dermed kravde Sund kommune overskjønn på vegne av selskapet, og saka kom opp i lagmannsretten.
Dei saksøkte, Sverre Telle og Sameiget Kvernavika, hevda i retten at ekspropriasjonsvedtaket er ugyldig. Dette vann dei altså fram med, og Sund kommune må i tillegg betala saksomkostningane deira på nærare 245.000 kroner.
– Dette er ei dårleg sak både for kommunen og for partane, meiner Albrigt Sangolt.
Det er likevel ikkje kommunen som sit att med utgiftene i saka. Rekninga endar opp hos Austefjorden Smolt.

Trudde dei var bundne

Då kommunestyret vedtok å ekspropriera, sa Nina Glesnes (Ap) frå talarstolen at ho ikkje hadde anna val enn å stemma for.
– Har vi sagt A, må vi seia B, sa Glesnes. Slik ho forsto det, måtte kommunen ekspropriera når dei først hadde vedteke reguleringsplanen.
Slik er det ikkje, slår retten fast. Før politikarane vedtok å ekspropriera, skulle dei ha vurdert om «inngrepet tvillaust er til meir gagn enn skade», som det heiter i oreigningslova.

Nina Glesnes og Ap-gruppa var i utgangspunktet motstandarar av å ekspropriera, men stemte likevel for, fordi dei trudde dei var juridisk bundne av tidlegare vedtak. Dette meiner lagmannsretten er sakshandsamingsfeil, og vedtaket er kjent ugyldig.
Hadde Ap-gruppa stemt imot, ville det ikkje vore fleirtal for ekspropriasjon.

Prioriterer lita verksemd

Lagmannsretten meiner også det er tvil om at tiltaket i Kvernavika er til meir gagn enn til skade, utan at dei vil overprøva kommunen på dette. Når det offentlege eksproprierer, er det som oftast til fordel for offentlege prosjekt som barnehage, skule og vegutbygging, eller for større industriområde dei har ein strategisk plan for.
– Sund kommune har valt å prioritera interessene til ei lita privat verksemd. Det skjer på bekostning av anna privat utnytting og næringsverksemd i Kvernavika, heiter det i rettsavgjerda. Lagmannsretten kan ikkje sjå noko klar samfunnsinteresse eller interesseovervekt i favør av inngrepet.

Er lei av heile saka

Denne vurderinga er sundordføraren lite begeistra for.
– Eg blir veldig provosert. Den delen av saka handlar om eit skjønn som lokalpolitikarane skal gjera, og retten skal halda fingrane langt borte frå det, seier han.
Sangolt har ikkje bestemt seg for om han går inn for å anka saka. Partiet hans stemte for ekspropriasjon, og Sangolt meiner framleis det var rett.
Kommunen kan også velja å ta opp saka om ekspropriasjon på nytt med påfølgjande klagerundar og eventuell ny fastsetting av erstatning.
– Dette må diskuterast i formannskapet. Eg byrjar å bli lei av saka, vi kan ikkje halda det gåande i det uendelege, seier Albrigt Sangolt.