Stor festival i lita bygd

Det er fiskeværet som tar kostnadene med festivalen, medan inntektene går til ungdomslaget.
Vi må heilt tilbake til 1991 for sist fiskefestival på Nautnes.
– Men no skal det bli ein fin tradisjon, meiner Ove Forstrønen.
Han har drømt lenge om dette.
– Eg pleier å lufta hunden her om søndagane. Då luftar eg også tankane og planane mine med dei gamle på Nautnes, fortel han. Slik lufting blir det festival av. 60 personar hadde meldt seg på fiskekonkurransen. Vinnar av ein 50 tommars flatskjerm var Rune Svellingen som tok den største fisken.

Bysseguten på «Vestgar»
Hovudattraksjonen denne helga var «Vestgar», den gamle rutebåten. Der møter vi på mannen som var byssegut under jomfruturen til «Vestgar» i 1957. Denne båten gjekk i rute i Øygarden fram til 30. mai 1979.
– Vi henta båten i Kristiansand, minnast Einar Nordvik.
– Stuerten ombord var Johan Tjong, som bur rett her oppe, fortel han og peikar. Saman serverte dei kaffi og mat til reisande mellom Bergen og Øygarden.
– I Bergen smurte vi 12 langebrød med løkrull og anna pålegg. Alt ved Hjelteskjæret var vi utselt, smiler han.

Hadde tårer i augo
Einar Nordvik har med seg familien i dag for å kikka på den gamle arbeidsstaden hans.
– Stig ombord, seier dugnadsmann Tore Isager i Øygardsbåtane.
Det var i haust at restaureringsarbeidet på «Vestgar» starta opp. Dette er første gongen båten blir vist fram for folk på denne måten.
– Folk hadde tårer i augo då vi kom på torsdag, fortel dugnadsgjengen.