Sei di meining om framtidas Straume

STRAUME: I forrige veke la formannskapet ut den omfattande planen, som legg grunnlaget for omforminga av regionsenteret Straume frå kjøpesenter til bysentrum. I fire månader framover kan alle som ønskjer det koma med innspel til planen. Verken kommune eller utbyggar legg skjul på at innspela frå regionale styresmakter er dei det knyttar seg størst spaning til.

Levande sentrum
– Fjell kommune og Sartor Holding har lagt mykje arbeid i å laga ein plan som kan gje eit levande sentrum. Det vonar eg Fylkesmannen vil sjå, seier eigedomsdirektør Ernst Einarsen.

Det er framfor alt Fylkesmannen og andre offentlege instansar som kan stansa eller kreva endringar i områdereguleringa. Det er ein omfattande plan staten sin mann og andre høyringspartar no får på bordet. Planen vil altså ligga ute i fire månader. Det kan ein trenga, for me snakkar her om den største, mest omfattande og detaljrike reguleringsplan som noko gong er fremja i Fjell kommune. Sentrum av regionsenteret skal få ei omfattande oppgradering gjennom åra som kjem. Gater, plassar og parkar må utformast med ein kvalitet som løftar sentrumskjerna frå bilbasert kjøpesenter til levande by for vandrande og handlande.

Riv for å bygga opp
For å få dette til må ein riva 12.000 kvadratmeter av dagens bygningsmasse. Til gjengjeld skal det over ein periode på eit par tiår byggast ut over 110.000 nye kvadratmeter. Bustader, butikkar, service og kontor vil kreva store parkeringsareal, men det aller meste av parkeringsplassar i dagen skal bort.

– Med tanke på å få Fylkesmannen og andre partar med på laget er det viktig at planen skaper eit tydeleg grunnlag for omforming av Straume, seier planleggar Hans-Jacob Roald i Fjell kommune.

Parkareal, opne plassar og gater som legg til rette for fotgjengarar og byliv må difor koma i staden for bilar og parkeringsplassar i overflata. Då må bilane ned i grunnen.

Fjellhallar
I søre delen av planområdet er det teikna inn to nye rundkøyringar. Frå søraust vert det innkøyring til ein fjellhall med 1500 parkeringsplassar. I nord kan ein bygga ytterlegare 950 plassar i eit fjellanlegg. Føresetnaden er eigen reguleringsplan som er samkøyrt med nytt fastlandssamband. I tillegg vert dagens parkeringsanlegg med 700 plassar vidareført. Men ein ting er parkeringsplassar i bakken under sentrum. Ein treng også eit vegsystem som kan få bilane inn og ut av Straume-byen. I formannskapet stilde Jorunn Gjersvik (Sp) spørsmål ved om vegsystemet har kapasitet til å ta unna trafikken.

Treng ny veg
– Tilkomsten til parkeringsareal frå sør er vesentleg i denne planen. Difor vert det avgjerande å få på plass den nye vegen mellom Arefjord og Storskaret, seier Hans-Jacob Roald.

Store parkeringsanlegg vil likevel på langt nær fjerna bilane totalt frå gatene i Straume sentrum. Tore Turøy (V) stiller spørsmål ved om planen tek nok omsyn til mjuke trafikkantar, når parkeringsdekninga i området vert auka så kraftig. Utbyggar Ernst Einarsen ser føre seg underjordiske parkeringsanlegg etter modell frå Klostergarasjen i Bergen.

– Tanken er å ha eit tilsvarande system med utgangar fleire stader i sentrum, framfor berre å slusa folk inn i senteret, seier Ernst Einarsen.

Inviterer folk med
Også handelsstanden er avhengig av at folk tek i bruk gatene, plassane, handletilbodet og dei offentlege tenestene som blir vendt ut mot desse areala. For sjølve kjerna i sentrumskjerna, «Festplassen», skal det lysast ut ein arkitektkonkurranse. Utbyggar og kommune skal saman utforma kriteria for konkurransen. For Fjell er det viktig å trekka fleire enn Fylkesmannen, Hordaland fylke og Statens vegvesen med i høyringa.

– Det er viktig å få nabokommunane med i høyringa, med tanke på Straume som regionsenter. Me har også tankar om utstilling og folkemøte til hausten, for å trekka folk med i høyringa, seier plan- og utbyggingssjef Willy Sørensen i Fjell.