Satsar på masterstudium

STRAUME: – Det vert nok eit ganske spisst studium, som først og fremst kan retta seg mot dei som tek ingeniørstudiet på Straume. Men andre kan også ta mastergraden her, seier dagleg leiar Sigmund Kvernes i Gode Sirklar, som har jobba for å få på plass studiet.

I haust byrja dei første studentane på Høgskolen i Bergen sitt ingeniørstudium i undervassteknologi. Her kan naturfagspirer ta bachelorgrad i på eit felt der mange bedrifter i regionen satsar tungt. Men no planlegg ein også å utvida til mastergrad – den høgaste, ordinære utdanninga ein kan ta i Noreg.

Samarbeid
– Også mastergraden skal vera basert på Straume. Men det er mogeleg at det vert nokre kurs på andre lærestader. Og det kan vera at mykje av arbeidet rundt ein mastergrad kan gjerast ute i bedriftene, seier Kvernes.

Initiativtakarane ser for seg at masterstudiet både kan vera for dei som nettopp har fullført ein bachelorgrad og for folk som jobbar i industrien og har lyst å fordjupa seg og få meir formell kompetanse.

Mastergrad er det som tidlegare var hovudfag, men som no er tilpassa internasjonale standarder. For å kunna tilby masterstudium på Straume, må Høgskulen alliera seg med eit universitet. Både Universitetet i Bergen og Universitetet i Stavanger har vore aktuelle, men no ligg det an til eit samarbeid med NTNU i Trondheim.

Treng pengar
Også Ekspertsenteret for undervassteknologi ønskjer Straume-baserte mastergradar velkomne.

Eit masterstudium på Straume er heilt avhengig av finansiering. Og ingeniørstudiet på Straume har så langt ikkje fått pengar til meir enn eitt års drift. Dermed er det førebels uavklart om det vert masterstudium her.

Biletet viser ein del av det første kullet på ingeniørutdanninga. Foto: David E. Antonsen