Returpunktet står i fare for å bli fjerna

SKOGSSKIFTET: For to veker sidan skreiv Vestnytt om returpunktet for glas, metall, papir og plast ved Sund senter i Skogsskiftet. Plassen var då tilgrisa med brukte bleier, matavfall, ein knust sofa, plast, papp og eit toalett.

– Eg var så skuffa veka etter oppslaget i avisa, for eg hadde forventa at folk fekk litt dårleg samvit, seier informasjonskonsulent Tina Skudal i Bir. Men også den veka var returpunktet forsøpla.

El-artiklar går gratis
– Når vi no endå ein gong opplever omfattande forsøpling her, står returpunktet i fare for å bli fjerna, seier Skudal. Denne gongen fann ryddemannskapet blant anna sekkar med restavfall, ein datamaskin og ein brødristar i haugen.

– Han som ryddar der ute, er fortvila, opplyser Skudal.

Returpunktet i Skogsskiftet har lenge vore eitt av problempunkta for Bir.

– Vi brukar store ressursar på opprydding, og det er med på å auka renovasjonsavgifta. Det er dårleg gjort at enkelte få skal øydeleggja for så mange, meiner Skudal. Ho viser til at artiklar som datamaskinar og brødristarar til og med er gratis å levera. Forhandlarar av denne typen varer er forplikta til å ta imot slikt avfall utan kostnad for kunden. Også på gjenbruksstasjonar kan ein levera slikt gratis.

Fjellsokning forsøplar
Denne gongen har Bir funne namn og adresser i bosset.

– Så no sender vi ut fakturaer for oppryddinga, opplyser ho. Ei kvinne i Sund er identifisert.

– Den eine forsøplaren har faktisk adresse på Straume i Fjell! seier Skudal.

Returpunktet i Skogsskiftet er det einaste punktet der ein kan levera både glas, metall, papir og plast på same plass.

– Vi har seks returpunkt i Sund, men dei fleste er kun for glas og metall, seier Skudal.

På Eide, Spildepollen, Glesnes og Klokkarvik finn ein returpunkt for glas og metall, medan ein kan levera både glas, metall og papir ved butikken på Forland. Det einaste punktet for levering av plast står i dag nettopp ved Sund senter, saman med konteinarane for glas/metall og papir.

– Alle privatkundar kan auka storleiken på papirspannet sitt frå 140 til 220 liter utan ekstra kostnad. Også plast kan kundane setja ut så mange sekkar dei vil til henting heime, opplyser Skudal.

Prøver først med eit skilt
– Kva med dei kundane som oppfører seg skikkeleg, og som leverer på korrekt måte i Skogsskiftet?

– Det er grådig synd, og vi likar ikkje å forringa tilbodet. Men må vi, så må vi. Vi ser ingen teikn til betring, og vi kan ikkje halda fram med å rydda opp ved dette punktet slik vi til no har gjort, seier Tina Skudal.

I første omngang blir det med det første hengt opp eit skilt ved returpunktet, med informasjon om at det blir fjerna dersom ikkje forsøplinga stansar.

– Så får vi gi det eit par veker etter det før vi bestemmer oss, seier Skudal.