Real Ones til Periferifestivalen

GLESNES: – Det er jo så gledeleg at det bandet vi no går ut med, laurdag kveld fekk Spellemannsprisen, seier pressetalskvinne Helga Golten i Periferifestivalen. Ho kan stadfesta det som mange lenge har rekna med, at det blir Periferifestival også i år. Samtidig fortel ho at Real Ones er eitt av banda som prydar festivalplakaten.

Siste helga i august

Bergensbandet Real Ones består av fem barndomsvenner som har spelt saman i 15 år. I fjor gav dei ut albumet All for the Neighbourhood, og på laurdag fekk dei altså Spellemannsprisen for beste popgruppe.

Årets Periferifestival, den tredje i rekkja, blir arrangert siste helga i august, nærare bestemt 28. og 29. august.

Festivalleiinga har fleire artistar på trappene, men Helga Golten vil ikkje ut med kven det er.

– Vi må ha kontraktane og alt 100 prosent ferdig, seier ho.

Grytten festivalpoet

Det som er bestemt og spikra, er at Frode Grytten blir festivalpoet.

– Vi har aldri før hatt festivalpoet, så det blir spennande å sjå korleis det artar seg, meiner Golten.

Grytten deltok på Periferifestivalen for to år sidan, då saman med bandet Finn Erix, kjent frå Radio Røynda. Han framførte då eit dikt skrive spesielt til festivalen, Sotra og Øygarden: Innerst i sjelen/Ytterst i periferien.

– Du skal ikkje sjå bort frå at han skriv noko nytt. Han skal i alle fall få god plass på festivalen, lovar Golten.

Festivalkunstnaren

Årets festivalkunstnar er også klar. Det blir Gro Petersen frå Fjell. Som tidlegare festivalkunstnarar på Glesnes stiller ho ut i kafeen på kaien. Petersen er utdanna blant anna ved Bath University College og ved Kunsthøgskolen i Bergen. Ho har ei lang rekkje utstillingar å visa til, og verka hennar er kjøpt inn av blant andre Statens Hus, Haugesund Sykehus, Bergen Brannvesen og Fjell kommune.

I arbeida sine tar ho oftast utgangspunkt i fotografiet, som ho kombinerer med tegna og malte flater.

– Det er viktig for oss at festivalkunstnaren passar inn i konseptet vårt. Det gjer Petersen, seier Golten.

Same profil som før

Det blir ingen store endringar av profilen på Periferifestivalen. Det handlar framleis om naust, sjø, kystkultur kombinert med musikk og annan kunst. Det vil også i år berre stå sjømat på menyen.

– Ingen har etterlyst verken pølse eller hamburger, smiler Golten.

I fjor hadde festivalen open dag for alle aldrar på laurdagen. Det blir det også i år.

– Men i år vil vi nok spissa dagtilbodet litt meir, slik at vi får noko spesifikt for barn og noko spesifikt for ungdom, forklarar Golten.

Ho blei overraska over kor mange som kom på dagarrangementet i fjor.

– Vi tenkte det skulle vera ein dag for bygda, men det kom enormt med folk, seier Golten.

Billettane til Periferifestivalen blir lagt ut allereie i morgon.