Prøver å kvitta seg med Frp-formannen

 I ei kort pressemelding skriv nestformann May-Elin Limevåg i Sund Frp at styret kallar inn til ekstraordinært årsmøte for «valg av ny formann».
– Utover pressemeldinga vil vi ikkje kommentera saka, seier Limevåg.

Fekk kritikk for jobben
Det er synet på asylmottaket på Klokkarvik som splittar partiet. Roald Broch fortel at han fekk kritikk frå deler av kommunestyregruppa i Sund Frp då det blei kjent at han hadde fått seg jobb som vaktmeister på asylmottaket som opnar i neste veke.
– Mitt mål med å ta jobben er å bidra til best mogleg gjennomføring både for innbyggjarane og dei som kjem. Eg hadde ikkje tatt jobben om eg hadde vore sterkt imot mottaket. Då hadde eg heller vore ein del av hylekoret utanfor, seier Roald Broch.

Broch tok avstand
Vestnytt skreiv laurdag om den siste interpellasjon frå Frp om asylmottaket, signert av gruppeleiar Svein O. Jacobsen og Jan Kåre Strønen. Denne interpellasjonen hadde ikkje Broch høyrt om før Vestnytt ringte, og Broch uttalte seg kritisk.
– Det er formuleringar her som eg tar avstand frå, sa Broch.
Det fall ikkje i god jord hos blant andre gruppeleiar Svein O. Jacobsen, og det blei kalla inn til eit ekstraordinært styremøte måndag kveld. Her hadde ikkje Roald Broch høve til å møta, og resten av styret vedtok altså at det skal veljast ny formann i partiet.
– Samstundes er eg blitt kontakta av andre medlemmer i Frp som støttar meg, fortel Broch.

Brev til fylkespartiet
– Føler du at du blir straffa for å ha tatt jobben på mottaket?
– Ja, eg føler vel det. Men eg  ser eigentleg ikkje noko problem i å vera Frp-formann samstundes som eg har den jobben, seier Broch.
Han opplyser at han sjølv har skrive eit brev til Hordaland Frp der han ber om deira syn på hans rolle i partiet kontra jobben på asylmottaket.
Broch er framleis kritisk til korleis enkelte i partiet går fram i asylsaka.
– Eg er litt forundra over at dei vil ha ny formann, for eg meiner eg bidrar til eit meir nyansert bilde av Frp sin asylpolitikk, seier Broch.

Årsmøtet bestemmer
Sjølv om styret ikkje har tillit til Broch, er det årsmøtet i lokallaget som må ta stilling til kven som skal vera formann i partiet. Ved siste korsveg vann Broch over Jan Kåre Strønen i voteringa om formannsvervet.
– Vil du kjempa for plassen din?
– Spørsmålet er om ein vil vassa i negative ting. Ein vil jo gjerne bruka fritida si på noko hyggeleg. Men har eg støtte, stiller eg sjølvsagt opp for partiet, seier Roald Broch.