Prøvde å selga kai utan å eiga den

HELLESØY: Terje Nordøy har brukt delar av sommaren på eit prosjekt på Nordøy. Der ligg óg kaien han og to andre bruk eig.

Men ifølge Øygarden kommune er det kommunen som eig kaien.

– Eg såg det i nokre sakspapir frå komité for teknikk. Der var ei liste over offentlege kaiar i kommunen. På den lista sto kaien på Nordøy, smiler Terje Nordøy.

Han tek det heile med ro, men tykkjer det var litt interessant å sjå at kaien er lista som offentleg, sidan den vart forsøkt seld for 24 år sidan.

Rutelaget ville selga
I 1986 sto det ein liten notis i Gula Tidend om at Øygarden og Sotra Rutelag ville selga kaien på Nordøy til Øygarden kommune.

«Øygarden og Sotra Rutelag ynskjer å selga ei kai på Nordøysund til Øygarden kommune. Staden vert brukt til feriestad. Kaia er oppførd i betong og rutelaget har sett salsummen til 30.000 kroner».

Det var den dåverande fiskerirettleiar Johannes Mikkelsen som oppmoda Øygarden kommune om å kjøpa eigedomen.

– Eg har forsøkt å få tak i prov som fortel om rutelaget klarte å selga kaien til kommunen eller ikkje, smiler Terje Nordøy.

Han tykkjer lite om at kaien er definert som offentleg, sjølv om han ikkje har noko i mot at folk nyttar seg av kaien.

– Eg er tilhengar av allemannsretten, og eg har ingenting i mot at nokon brukar kaien, men det er greit å ha på det reine at denne kaien har vore i familien min, og to andre familiar, sitt eige i ganske mange år, seier Terje Nordøy.

Humoristisk
Han tykkjer det er ganske morosamt å oppleva at kaien no står som offentleg.

– Eg har snakka med den nye kommunalsjefen i Øygarden, Johnny Danielsen, som forstår problemstillinga. Kommunen kjem til å sjå nærare på saka, seier Terje Nordøy.

Då rutelaget forsøkte å selga kaien, gav familien Nordøy beskjed kven som eigde den. Sidan høyrte dei ikkje noko.

– Det gjekk 24 år før me såg at kaien var lista som offentleg, smiler Nordøy.

No ber han eigarar av slike anlegg, sjekka papira sine.

– Det er greit å sjekka om ein faktisk har alt på det reine og at ein har alle prov ein treng. Det er greit å legga alt til rette for dei komande generasjonane, slik at dei ikkje får seg nokre overaskelsar, seier Terje Nordøy.

Kaien vart bygd på 50-talet. Etter ei jordskiftesak  i 1960, vart eigedomen fordelt på tre bruk på Nordøy. Det er dei som eig kaien i dag.

Det let seg ikkje gjera å få tak rette vedkomande i Øygarden kommune, på grunn av ferieavvikling.