Panorama konferansehotell opnar i dag

I dag opnar hotellet. For dei som har eit bilete av korleis hotellet ein gong såg ut då det heitte Marsteinen hotell, så er det berre å legga dei minna på hylla.

Det nye konferansehotellet er ei perle med direkteutstikt til Tofterøy. Kvar hotellromdør har eit bilete frå ein eller annan stad i Sund. Arkitekten har verkeleg tatt kommunen si historie på alvor då han planla korleis hotellet skulle sjå ut.

Opitz opna dørene

Ole Martin Opitz er marknadssjef på hotellet. Det var ein lettare stressa, men smilande Opitz som tok i mot Vestnytt berre nokre dagar før opninga.

Den hektiske aktiviteten kring i heile hotellet vitna om at datoen i dag skulle haldast.

– Me har totalrenovert hotellet. Ein vil ikkje kjenna seg att her, smiler Ole Martin Opitz.

Me sit ute i minglerommet. Sidan det er eit konferansehotell, så er stadar der konferansegjestene kan vera saman utanom møter og seminar svært viktig. Det har Opitz tatt på alvor.

– Me har lytta til andre som har røynsle med konferansehotell, og dei har sagt at såkalla minglerom var viktig, seier marknadssjefen.

Dei har holdt på heilt sidan 2008. Ein enorm sal er framleis under arbeid, og den vert ikkje ferdig før til neste år.

Men då vert det den største bankettsalen i stor-Bergen. Med sine 1000 kvadratmeter, vert salen større enn kva sjølvaste Grieghallen kan verta vertskap for.

– Det vert den største bankettsalen med plass til 900 gjester, seier Opitz.

Men han vil heller snakka om det opningsklare hotellet.

Gjennomført

Alt frå resepsjonen til dører og veggar er ei reise i kystkultur blanda med modernisme. Steinveggar glir saman med plysj, og naustdører markerer inngangen til kvar av dei 57 dobbeltromma.

– Korleis er belegget no?

– Me er vel meir eller mindre fullbooka fram til hausten, og det var klart før hotellet opna, seier Ole Martin Opitz stolt.

– Flink seljar du då?

– Det er heller eit hotell som sel svært godt. Dei som har sett hotellet, vart svært positivt overraska, smiler Opitz.

Denne helga var over 200 menneske i sving for å verta ferdig med hotellet. Til og med tilsette, som skal driva hotellet, har kome for å hjelpa.

Fleire årsverk

Hotellet vil ha ein kjerne på kring ti fast tilsette.

– I tillegg vil det vera rundt 30 deltidsstillingar og 60 til 70 ringehjelparar. Me må vera fleksible når me er eit konferansehotell, seier marknadssjefen.

Me sit inne i «eldhuset».

– Arkitekten vår, Lasse Nøstvold hjå Vaardal Lunde arkitekter, har sett det maritime og moderne saman. Han har vore svært opptatt av å få fram kjenneteikna og det unike frå Sotra, seier Ola Martin Opitz.

De er fleire slike små rom spreidd rundt i det store minglerommet.

Det er Marsteinen Holding som er eigar av dei to selskapa som skal drifta konferansehotellet. Dei to er Marsteinen eigedomsselskap og eit nytt driftsselskap under namnet Panorama konferansehotell AS.

– Er du nervøs?

– Hehe, nei, ikkje nervøs, men svært spent. Eg trur dette går bra, smiler Ole Martin Opitz berre nokre døger før den store opningsdagen.