På jakt etter nytt kjøkken

Arthur Fjetland, betre kjent som Kokken Arthur, har leigd kjøkken og selskapslokale på Møvik kai i Fjell dei siste fem åra. No har han arrangert sitt siste selskap i lokala.

– Førebels har eg behalde kjøkkenet på Møvik, men eg er på jakt etter nye lokale, seier kokken.

Ikkje estetisk nok

Det er spesielt miljøet på utsida av selskapslokala på Møvik han er misnøgd med.

– Det er ikkje fint nok reint estetisk. I tillegg er det ei blanding av aktivitetar som ikkje passar så godt, seier kokken.

Han vil gjerne gi eit meir heilskapleg tilbod til gjestene sine enn det han har kunna gjera på Møvik.

– Eg vil gjerne at gjestene mine skal kunna sitja utandørs og ta seg eit glas utan at nokon står og skrur på ein bil like ved, seier Fjetland.

– I tillegg har eg brukt to millionar kroner på husleige og straum dei siste fem åra, legg kokken til.

Er open for idear

Kokken Arthur har opparbeidd seg eit namn på Sotra og er ein populær cateringleverandør. Han produserer framleis cateringmaten på kjøkkenet på Møvik, men er altså på jakt etter noko nytt.

Han er open både for å leiga kombinert kjøkken og selskapslokale, eller berre kjøkken.

– Det er stort behov for selskapslokale her ute, og folk er opptekne av skikkeleg mat. Dei er lei av blomkålsuppe og svinesteik, meiner Kokken Arthur. Han håpar folk tar kontakt om dei har ein idé eller eit tilbod.

– Er det nokon som har eit lokale og som er ute etter ein kokk med ADHD, veit dei kor eg er, flirer han.

Slutt på Oksen også

På forsommaren i fjor satsa han friskt ved å opna Vestlandets største selskapslokale på holmen Oksen vest for Solsvik. Oksen er eigd av Liegruppen, som i mange år har forsøkt å selja holmen.

I fjor gjorde Liegruppen ein avtale med Kokken Arthur om selskapslokala på holmen. Her skulle det arrangerast blåturar og selskap, og det skulle haldast ope i helgane.

– Eg arrangerte seks-sju selskap gjennom sommaren med alt frå 90 til 550 menneske. Tilbakemeldingane frå gjestene var gode, men det blei tungvint, seier Fjetland. Han mista også litt gløden då Liegruppen på nytt annonserte sal av Oksen.

– Eg trudde nok at dei ville vera med og sparka litt ifrå, så eg mista piffen.

Dermed kjem han ikkje til å halda fram på Oksen komande sommar.

– Dersom dei vil leiga meg inn til noko, er eg med på det, men eg kjem ikkje til å driva noko på eiga hand der til sommaren, opplyser han.

Men satsar på Lokøy

Til påske er det fire år sidan Fjetland kjøpte ein eigedom i Linevik på Lokøy. Den satsar han tungt på.

– Alt eg har hatt av overskot andre stader, har eg lagt ned der ute, seier Fjetland. Han ventar no på å få tilkopla vatn, og han skal i gang med søknader for å få godkjent lokala som selskapslokale.

– I mai er det fullt. Eg har måtta seia nei til fleire konfirmasjonar allereie, opplyser han.

På Lokøy har han plass til maks 30 personar.

– Det blir femti gongar meir eksklusivt enn det eg har hatt på Møvik. I tillegg er det mitt eige, seier Kokken Arthur.