Opptur for AGR i år

STRAUME: Konserndirektøren i AGR Field Operations kan sjå attende på eit godt halvår for sitt forretningsområde. Med eit driftsresultat på 28 millionar kroner i andre kvartal kan Åge Landro (i midten på biletet) slå fast at dette veg opp for eit noko tyngre første kvartal.

– Andre kvartal brukar å vera betre, men me har eit resultat i år som er fem millionar kroner betre sett i høve til same kvartal i 2009. Me har hatt ei sterk drift over tid og haustar frukter av langsiktig tenkning, seier konserndirektør Åge Landro.

Nye kontrakter
Etter å vunne fleire nye kontrakter i seinare tid ventar Landro at veksten vil halda fram for Field Operations. Halvårsresultata som AGR Group la fram tidleg denne veka viser betring på alle felt for det børsnoterte oljeserviceselskapet. I tillegg til Field Operations (feltoperasjonar) har AGR forretningsområda Drilling Services (brønnservice) og Petroleum Services (reservoar-evaluering og brønnplanlegging). Drilling Services gjekk frå eit underskot på over 200 millionar kroner i fjor til oppunder fire millionar i underskot for andre kvartal 2010.

– Det går heilt klart betre for heile selskapet. Også Petroleum Services hadde ein nedtur i 2009, som følgje av krisa. I år ser det ut til å bli ein opptur, seier Landro.

Ny eigenkapital
For denne delen av AGR var siste kvartalsresultat på litt over 26 millionar kroner. 2010 ser altså langt betre ut for heile selskapet enn det tunge fjoråret. Men AGR henta i blytunge 2009 heile 175 millionar kroner i ny eigenkapital.

– Det skjedde nettopp på grunn av den situasjonen me var oppe i. Nedgangen gjorde at det vart avgjerande å få ned gjeldsgraden i selskapet. AGR sin hovudeigar Altor tok ansvar og bidrog til refinansieringa, forklarer Landro.

Det private fondsselskapet Altor sit med 76 prosent av AGR. Det er slik sett få av AGR-aksjane som er i omløp på børsen.

– Likevel er det hyggeleg å sjå at AGR sin verdi på børsen stig og no er meir i tråd med verdiane i selskapet, seier Åge Landro.