Ønskjer å flytta og utvida open barnehage

STRAUME: Den kristne organisasjonen Fjell KFUK-KFUM (Fjell KM) driv i dag tre avdelingar med open barnehage i kommunen. Den eine ligg på Fjell gard, den andre på Landro og den tredje altså på Straume.

– Vi har lenge hatt lyst til å flytta nærare senteret, opplyser styrar Christin Hitsøy Larsson.

Treng større plass
Open barnehage er eit gratis tilbod for foreldre og barn. Sidan foreldra er med barna, er det berre to tilsette i avdelingane. I barnehagane til Fjell KM er det alltid ein førskulelærar på jobb.

– Og alle dei tilsette har relevant utdanning frå høgskule, seier Larsson.

Lokala i Røde Kors-huset er for små for barnehagen, og personalet må kvar dag rydda til side alt av leiker og utstyr. Ved start og slutt av kvar veke må også bord og stolar flyttast fram eller tilbake, sidan lokala også er i bruk av andre leigetakarar. No søkjer barnehagen Fjell kommune om å få godkjent flytting til Temahuset på Straume, som har ledige lokale.

– Men ingenting her er avklart, verken med kommunen eller med huseigarane, understrekar Larsson.

Norsk for store og små
Talet på besøkjande varierer frå dag i til dag i dei opne barnehagane, som alle har ope tre dagar i veka, men barnehagen søkjer om godkjenning for ei gruppe på 45 barn i Temahuset.

– Vi trur endå fleire enn i dag vil bruka barnehagen dersom han ligg meir sentralt. Då vil fleire koma innom ein tur, og det blir lettare å finna oss for folk som kjem med bussen. Også for framandspåklege blir det enklare, trur Larsson.

I fjor fekk Fjell KM midlar både frå Fjell kommune og Fylkesmannen i Hordaland til eit prosjekt retta mot minoritetsspråklege barn.

– I ein open barnehage er det dessutan ikkje berre barna som lærer norsk, det gjer også foreldra, påpeikar Larsson. Barnehagen har hatt ein auke i brukarar frå minoritetsfamiliar.

Kveldsope og barnepass
Dersom dei får flytta, ser Larsson for seg at tilbodet kan utvidast og utviklast på fleire måtar. Ein av ideane er å etablera kveldsopen barnehage.

– Vi trur det er trong for ein treffstad også på ettermiddag og kveld. Dette vil vera eit tilbod på lik linje med det vi har på dagtid, seier Larsson.

Også ordninga med barnepass kan utvidast ved ei flytting.

– Vi oppmodar folk om å snakka med kvarandre og hjelpa kvarandre med barnepass. Slik kan for eksempel åleineforeldre få gjennomført naudsynte ærend, seier Larsson. Barnehagen kan ikkje sjølv ta ansvar for barnepass, men dei kan leggja til rette for organisering og samarbeid mellom brukarane av barnehagen.

Alle sosiale lag
Larsson meiner den typiske brukaren av open barnehage ikkje finst.

– Vi har mødre, fedre og folk frå alle sosiale lag, seier ho.

Sjølv om desse barnehagane blir drivne av ein kristen organisasjon, er alle velkomne.

– Pregar religionen tilbodet på nokon måte?

– Det kan henda det dukkar opp ein kristen sang i samlingsstundene. Men vi har ingen andakt, bønnestund eller noko form for forkynning, understrekar styraren.

Lokala i Temahuset barnehagen ønskjer å leiga, ligg i andre og tredje etasje i sørenden av bygget, mot Sartorparken. Her ser dei for seg 300 kvadratmeter fordelt på fellesrom, kantine, kontor, toalett og mange adskilte rom.

– Vi trur ei flytting vil styrka tilbodet, konkluderer Christin Hitsøy Larsson.