Nye vedtekter skal avgrensa «tigging»

FJELL: – Me opplever at folk oftare ringjer og klagar, særleg på utlendingar som går frå dør til dør og ber om pengar til seg sjølve. Dette vert opplevd som tigging som i nokre høve er skremmande, men politiet har i dag ingen heimel for å sjekka opp med mindre innsamlarane er direkte trugande, seier lensmann Odd Dale.

Registreringsplikt
Han har difor bedt Fjell kommune om å endra eit punkt i dei kommunale politivedtektene, slik at alle som ønskjer å samla inn pengar får krav om å registrera seg hjå politiet først. Slik det er i dag er det lovleg for kven som helst å gå rundt og samla inn pengar, enten føremålet er å samla inn til ein organisasjon eller ein ber om «ein tiar til ein kopp kaffi». Viss endringa går gjennom vil det framleis vera lov å samla inn pengar til meir eller mindre gode føremål, men ein må først registrera seg.

– Politiet vil framleis ikkje kunna nekta nokon å samla inn pengar til seg sjølv, men me får ei oversikt over dei som har registrert seg. Får me då klager på nokon som ikkje har registrert seg har me heimel til å visa dei bort, seier Odd Dale.

Ikkje eit «tiggeforbod»
Lensmannen understrekar at politiet allereie i dag kan rykka ut viss nokon driv trugande tigging. Men opplevinga av kva som er trugande vil vera individuell og det er oftast vanskeleg å prova noko straffbart ved slike høve.

– Viss denne endringa i vedtektene går gjennom så er ikkje det noko forbod mot tigging. Den debatten må ein ta på eit høgare, politisk nivå. Krav om registrering vil likevel gje oss betre oversikt, seier Dale.

Politikarane i komite for finans og forvaltning i Fjell gjekk i forrige veke samrøystes inn for å senda endringa i vedtektene på høyring. I tre veker kan offentlege instansar, private og organisasjonar uttala seg om registreringsplikta. I brevet til kommunen påpeikar lensmann Odd Dale at det er viktig med like vedtekter på dette feltet i heile lensmannsdistriktet, Sotra, Øygarden og Askøy. Øygarden kommune har i sitt framlegg til nye politivedtekter teke med ei slik registreringsplikt.

– Fleire kommunar har allereie innført registrering for innsamling av pengar. Viss publikum så tek kontakt kan politiet enten beroliga med at innsamlinga er registrert, eller så har me heimel for å rykka ut og visa bort personar som driv med uregistrert innsamling, seier lensmann Odd Dale.

Høgare terskel
Administrasjonen i Fjell understrekar at ei registrering hjå politiet ikkje vil vera det same som ei godkjenning av føremålet med innsamlinga. Erfaring frå ulike område viser likevel at ei registreringsordning hjå politiet har ein preventiv verknad, slik at terskelen vert høgare for useriøse aktørar. I tillegg til å få høyra om innsamlarane har registrert seg, kan publikum få politiet si vurdering av i kva grad innsamlinga er seriøs.

– Mitt initiativ går på å få like reglar for dette i lensmannsdistriktet. Ein vil ikkje kunna hindra det som kan definerast som tigging, men registreringplikt er likevel ein reidskap for betre kontroll, meiner lensmann Odd Dale.