Ny rolle for Landro, nye oppdrag for AGR

NÆRING: Åge Landro har vore i selskapet i sju år. Der var han ansvarleg for å utvikla verksemda i Field Operations, som vart seld til det amerikanske selskapet Oceaneering i fjor haust. Etter ein kort pause er Landro attende i AGR, som i ei pressemelding opplyser at Åge Landro altså vert konserndirektør for petroleumstenester. Konsernsjef Sverre Skogen seier i meldinga at han er trygg på at Landro vil leia oljeservice-divisjonen til vekst, slik han gjorde med verksemda innan Field Operations.

Sjølv ser Landro fram til rolla innanfor den nye strukturen til AGR. Selskapet er no delt i dei tre divisjonane boreløysingar, verkty og teknologi samt petroleumstenester.

– Sidan eg kom attende til AGR i mai, har eg brukt det meste av tida på å jobba saman med tilsette og kundar innan petroleumstenester. Målet er å finna den beste vegen framover og sikra AGR rask vekst og eit solid forretningsgrunnlag på dette området, seier Åge Landro.

Då treng AGR eit unikt tenestetilbod og gode løysingar på programvare. Det ser det norske selskapet med utgangspunkt på Straume ut til å ha innan fleire felt. Nyleg vart oljeservice- og teknologibedrifta tildelt ein Statoil-kontrakt verd 30 millionar kroner. Saman med Statoil skal AGR utvikla ei ny løysing for trykkbalansert boring frå flytande riggar. Målet er betre kontroll, tryggleik og evne til å bora kostnadseffektiv, på djup der ein vanskeleg kjem til med tradisjonelle teknikkar. Dessutan har AGR fått ein stor kontrakt på eit anna område. Det er det statlege føretaket for Co2-handtering, Gassnova, som har tildelt AGR ein kontrakt verd 80 millionar kroner. Dei neste fire åra skal AGR vera teknisk rådgjevar for Gassnova på lagring og transport av Co2 på norsk sokkel.