Ny ferje på plass i februar

KLOKKARVIK: I juni i fjor kjøpte Bergen-Nordhordland Rutelag (BNR) ferja som skal gå mellom Klokkarvik og Hjellestad via øyane Lerøy og Bjelkarøy i Sund. M/F «Sundferja», tidlegare «Kvaløy», blei bygd ved Skjervøy Skipsverft i 1977.

– Ferja er oppjustert i tråd med krava som Skyss har sett, seier styreleiar Helge Skaar (bildet) i BNR.

Auka kapasitet
Frå søndag 1. januar fram til «Sundferja» er på plass, er det reserveferja «Fjordbas» (biletet) som fraktar folk frå øyane til og frå fastlandet. Den tar 17 bilar og 90 passasjerar, medan «Sundferja» har kapasitet til minst 16 bilar og 82 passasjerar. Her er ikkje endeleg sertifikat på plass etter ombygginga av fartøyet. Til samanlikning tok «Fjordgar» 9 bilar og 62 passasjerar. Tide og «Fjordgar» hadde sin siste tur på sambandet 31. desember.

– Vi har fått positive tilbakemeldingar på at kapasiteten aukar, seier Skaar.

Han er glad for at selskapet kan tilby auka kapasitet, spesielt med tanke på køproblematikken til og frå Sotra.

– Det er mange som pendlar til Bergen, og ferja kan vera attraktiv for mange. Vi har stor tru på dette sambandet, seier Skaar.

Oppgraderer ferjekaiane
«Sundferja» har lege hos Båtbygg AS for ombygging fram til midten av desember. Fartøyet har blant anna fått nytt styresystem, handikapptoalett og nye motorar.

Ferjekaien på Lerøy er under oppgradering i desse dagar. Sjølv om det er Sund kommune som eig kaien, bidrar BNR til opprustinga. Det gjer dei fordi dei ved å byggja om på ferjekaiane sparar utgifter til ombygging av ferja som skal gå der. BNR justerer også ferjekaiane på Bjelkarøy og Hjellestad for eiga rekning delvis for å unngå ytterlegare ombygging av «Sundferja», men også for å kunna oppretthalda kapasiteten på ferja.

– Det er sett opp ein passasjerbåt som fraktar folk til og frå Lerøy medan kaien der er stengt, opplyser Skaar. Arbeidet med ferjekaien på Lerøy skal vera ferdig i midten av januar.