Ny bru parallelt med Sotrabrua

På bysida skal vegen gå langs dagens trase, utan fleire tunnelar enn i dag. Løysinga inneber og at ein fjernar krysset ved Lidl.

Dette er konklusjonen etter vegvesenet sin faglege gjennomgang av dei ulike alternativa. Fagfolka meiner at den nordlege løysinga vert billegast og at den best løyser trafikkproblema. Som Vestnytt tidlegare har omtalt, er vegvesenet lite innstilt på samband i sør eller ei løysing med tunnel i nord.

Vegvesenet ventar etter kvart opp mot 34.000 bilar dagleg på den nye brua, medan trafikken på den noverande Sotrabrua kan verta på opp mot 13.000 bilar dagleg.

På skissa er denne løysinga vist som den nest øverste grøne streken over fjorden.

Statens vegvesen reknar med at denne løysinga, med firefelts bru og gang- og sykkeltveg, vil kosta 3 milliardar kroner.

Seglingshøgda på den nye brua vert 50 meter, det same som dagens bru. Også høgda på brutårna vert om lag slik som på den eksisterande Sotrabrua.

Statens vegvesen ønskjer nytt kryss på Bildøy, og har to alternativ for vegen vidare mot Arefjord: Ei ny firefeltsbru over Straumsundet og tunnel vidare til Arefjord, eller utvida dagens veg og bru og byggja ein rundt 400 meter lang miljøtunnel forbi Straume. Prisen på begge desse alternativa er rundt 1 milliard kroner.

Statens vegvesen har også lagt fram ulike alternativ for det nye vegsystemet nord-sør på Sotra. Kva som er vert vald, vert i stor grad eit prisspørsmål. Statens vegvesen tilrår ei løysing til rundt 600 millionar kroner, medan dei dyraste vegløysingane inneber at ein passerer 1 milliard.