Misnøgd med pasienttransporten

SUND: – Tennene står i bordkanten av raseri, illustrerer kommunelege I, Svein Halvorsen i Sund kommune. Han opplever stadig at pasientar som har time, ikkje møter opp. Forklaringa er at drosjen dei bestilte, ikkje dukka opp.

Venta i tre timar
– I dag hadde eg ein pasient som ikkje kom seg heim etter legetimen. Etter å ha venta i tre timar, var det ein annan pasient som til slutt tok henne med seg og kjørte henne heim, fortel Halvorsen.

I vinter hadde han ein eldre pasient med føreståande kritiske hjarteoperasjonar, som blei ståande på kaien på Klokkarvik i femten minusgrader fordi drosjen frå Bergen Taxi ikkje dukka opp.

– Heldigvis hadde mannen mobiltelefon, slik at han fekk ringt oss og vi fekk henta han, sukkar Halvorsen.

Han fortel at både han sjølv og andre i personalet til tider kjører pasientane heim etter time.

– Endå verre er det at dei ikkje kjem seg til lege. Nyleg var det ein pasient i 80-årsalderen med kronisk lungesjukdom og som nyleg hadde hatt hjarteinfarkt, som treng tett oppfølging, som ikkje kom seg til avtalt time, fortel Halvorsen.

Verst på ettermiddagar
Det er ikkje første gang kommunelegen i Sund klagar over pasientreiseordninga. Også ordførar, fysioterapeut og tilsette på Sundheimen gav hausten 2008 uttrykk for stor misnøye.

– Ja, dette har vore eit stort problem lenge. Mitt inntrykk er at Bergen Taxi nedprioriterer pasientreiser i distrikta, kanskje fordi sjåførane taper pengar på å reisa langt ut frå sentrum? spekulerer Halvorsen.

Han trur også at fleire eldre lar vera å senda inn klage.

– Eg har fått beskjed om at klager kun kan sendast på e-post. Og viss ingen klagar, blir ingenting endra, seier Halvorsen.

Han meiner uansett at systemet er for dårleg når eldre og sjuke blir skadelidande.

– Det er ille når pasientane til slutt har meir bruk for ein sjukebil enn ein drosje, ein kan bli sjuk av mindre, seier Halvorsen. Han kan ikkje talfesta kor ofte problemet oppstår.

– Men det er verst på ettermiddagar, seier kommunelegen.

Ønskjer omorganisering
Han meiner også at drosjesjåførane har meir å gå på når det gjeld behandling av eldre og sjuke.

– Eg har pasientar som ikkje vågar å bestilla drosje fordi dei har opplevd å bli skjelt ut av sjåføren. Det er jo også god økonomi, når pasientane ikkje vågar å ringa, seier Halvorsen ironisk. Han lengtar tilbake til tida då lege eller pasient kunne ringa direkte til ein lokal drosjesjåfør.

– Då kom i alle fall bilen. Det var ei mykje betre ordning, seier legen. Han meiner dagens ordning må omorganiserast, slik at omsynet til pasienten blir prioritert høgare enn økonomi.