Meir samarbeid om strandsona

– Samarbeid om ein felles plan for strandsona har vore svært positiv for Sunnhordland. Kartlegginga av areal har også gjeve regionen uttelling for langt meir strandsone enn dei var registrert med i oversikta til statistisk sentralbyrå, seier Askøy-ordførar Siv Høgtun (H).

Betre dialog med staten

Saman med ordførarar og rådmenn frå Øygarden, Fjell og Sund var ho i går føremiddag til stades då styreleiar Ove Trellevik sette møtet for Regionrådet Vest på Rong. Prosjektleiar Torgeir Sæter gjorde greie for fleire av dei prosjekta som kommunane i regionen no vurderer, mellom dei ein felles kommunedelplan for strandsone og byggesaker.

– Ein felles regional politikk for strandsona kan vera nyttig også for kommunane i vest. I Region Vest har me fått orientering om erfaringane frå Sunnhordland. Prosjektet har mellom anna gjort dialogen med Fylkesmannen langt betre for kommunane i sør, seier Torgeir Sæter.

Målet med prosjektet i Fjell, Sund, Øygarden og Askøy er å bruka den nye plan- og bygningslova slik at delar av strandsona får stå urørt, medan andre delar kan brukast til bygging. Ønsket er å få ned talet på dispensasjonssøknader og skapa ei bærekraftig forvaltning av strandsona i regionen.

Vil forankra arbeidet

Siv Høgtun var tilstades då sunnhordlendingane vitja prosjektleiinga på Askøy. Ho vil trekkja dei folkevalde i alle fire kommunar med i arbeidet så raskt som råd, helst når formannskapa er samla til Tinget i Vest om to veker.

– Politikarane må få vita meir om kva dette er og få høve til å gje signal om kommunane skal gå vidare med samarbeid om strandsone og byggesaker. Me må få vita kvifor dette samarbeidet er viktig å bruka tid og krefter på, seier Høgtun.

Strandsone-samarbeidet er del av eit større regionprosjekt der også samarbeid om byggjesaker og arealplanleggjing står på agendaen. Askøy-ordføraren har lansert tanken om å bruka kommunedelplan som arbeidsmåte for strandsona. Det er ein plan som i så fall må handsamast i kvar kommune, slik at alle fire kommunestyra må gjera vedtak i plansaken.

Skeptisk til ressursbruk

Ordførar Otto Harkestad (Ap) i Øygarden stiller spørsmål ved bruken av tid og ressursar på ein slik kommunedelplan.

– I Øygarden jobbar me på overtid med ny arealplan, som skal vera klar til neste sommar. Eg vil vera varsam med alt som kan forstyrra arbeidet ved ei planavdeling som har meir enn nok å gjera, seier Harkestad.

Han peikar også på at det frå staten si side er gjeve strengare retningslinjer for arealbruken i strandsona kring Bergen, samanlikna med kva som er tilfelle i Sunnhordland. Harkestad vil likevel ikkje utelukka at ein felles strandsonepolitikk kan gjera det lettare å koma til semje med Fylkesmannen, når det er noko kommunane ønskjer å byggja i kystbeltet.

– Strandsona er vanskeleg å unngå i Øygarden, så me er dei første til å støtta prosjekt som fører til betring. Me vert stadig meir frustrert over kor lite det vert opna for av verdiskapande tiltak, seier Otto Harkestad.