Måtte forsterka taket mot snøen

BILDØY: – Me oppdaga ein dragar me ikkje stolte på, så den har me støtta opp, fortel Roald Orvedal. Han er drifts- og vedlikehaldssjef ved eigedomsavdelinga i Hordaland fylkeskommune.

Bakgrunnen for uroa er dei store snømengdane denne vinteren. Snøen legg seg i mange tong tunne lag på taka. Og på Sotra vidaregåande skule var ein altså litt i tvil om ein av dragarane i taket ville takla vekta.

­– Det kunne vera fare for at konstruksjonen var for hardt belasta. No er det ordna med støtter, men me kjem og til å gjera ei varig endring der, seier han.

Kantina er no opna att, og fylkeskommunen gjer sitt for å halda oversikt over kva snøen gjer med andre bygg i deira eige.

– Me har sendt ut ein epost til alle om at dei må følgja med og sjå, om ein høyrer knakelydar eller liknande. Me er taknemmelege for tilbakemeldingar. Det er konstruksjonar med flate tak som er mest utsett, og det er jo veldig lenge sidan ein har hatt slike snømengdar som no, seier Orvedal.

Etter at dei støtta opp taket på Sotra vidaregåande, har det kome endå meir snø. Om no det går over til våtare snø, blir det stor belastning på mange tak. Spesielt store hallar med stort spenn kan vera i faresona, og dei siste åra har ein hatt tilfelle der til dømes taka i idrettshallar har rasa saman under vekta av mykje snø. Men å dra opp på alle tak for å fjerna snø manuelt, er ikkje aktuelt for fylkeskommunen.

– Risikoen er nok større for at nokon då dett ned enn risikoen for at taket rasar saman, seier Roald Orvedal til Vestnytt.