Lokkar bysjeler til Jesus med nytt bedehus

STRAUME: Medan mange bedehus slit med oppslutnaden, opplever Brattholmen Indremisjonslag å vera i medvind.

– Situasjonen for Brattholmen er atypisk, stadfestar Johnn Hardang, styreleiar i Midthordland Indremisjon.

Samlar 120 menneske
Dagens bedehus på Brattholmen er i trangaste laget.

– På ein gjennomsnittleg søndag samlar vi 120 menneske i bedehuset, fortel Atle Våge i Straume Forum AS. Dette selskapet er oppretta for å få realisert planane om å byggja nytt bedehus på Straume. Tomta ligg like ved vegen ned mot idrettsparken, og det er i dag Egill Danielsen Stiftelse som eig tomta. Danielsen driv den kristne privatskulen i idrettsparken.

– Vi har opsjon på å få kjøpa tomta så sant Fjell kommune godkjenner byggjesøknaden, seier Våge. Og søknaden ligg no hos kommunen og ventar på behandling.

Grendahus og interiørbutikk
Tidlegare var det tre bedehus på Litlesotra.

– Bedehuset på Foldnes er blitt grendahus, og forsamlingshuset i Knarrevik er blitt interiørbutikk, slår Våge fast.

Samstundes har Litlesotra gjennomgått ei enorm utvikling, og med planane om utvikling av Sotra kystby er det venta ytterlegare fart i folkevekst og aktivitet.

– Vi tenkjer strategisk. Vi vil vera dristige, framtidsretta og relevante, seier Hardang.

– Og det finst ikkje betre plassering enn denne, legg Våge til.

Kulturhus og konferansar
Det nye bedehuset er også planlagt som forsamlings- og kulturhus, og tanken er å kunna leiga ut til konferansar på kommersielt grunnlag.

– I første etasje ønskjer vi å få på plass ein ideell gjenbruksbutikk. Det finst ikkje på Sotra i dag, seier Våge. På same plan som gjenbruksbutikken er det planlagt garasjeanlegg med plass til 30 bilar.

– I hovudetasjen skal vi ha forsamlingssal med scene og fleksible veggar inn til mindre konferanserom, opplyser Våge. På det meste vil det bli plass til 700 sitjeplassar i hovudsalen.

Samlar faste gåver
Deler av toppetasjen håpar initiativtakarane at landsadministrasjonen til Indremisjonen vil takka ja til.

– Dei har i dag administrasjon på Bildøy. Vi har føreslått at dei sel huset sitt der og kjøper seg inn i dette prosjektet i staden, seier Våge.

Prosjektet er kostnadsrekna til 48 millionar kroner. Det betyr eit krav til eigenkapital på 8 millionar kroner.

– Deler av eigenkapitalen tar vi inn ved å selja dagens bedehus. Resten får vi inn gjennom gåver, dugnad og eigeninnsats, opplyser Våge.

For å dekka renter og avdrag på lån, har arbeidsgrupa kome til at det trengst 100.000 kroner i månaden gjennom faste gåver, i tillegg til leigeinntekter på huset og inntekter frå gjenbruksbutikken.

Gjengen er klar til å setja i gang så snart kommunen har gitt løyve.

– Eit slikt prosjekt må vera i framdrift for å kunna realiserast, seier Johnn Hardang.