Langt større enn Klostergarasjen

Så sant alle løyve kjem på plass i tide, startar arbeidet med den store parkeringshallen under Sartor Storsenter midt i april. Innkjøringa til hallen kjem i krysset like ved Sprek og Blid, sør for senterområdet, og det er herfrå ein sprengjer seg nedover til området der hallen skal liggja.

Inn ved treningssenteret

– Innkjøringa til sjølve hallen blir under kjøttdisken til Ica, smiler Ernst Einarsen i Sartor Holding.

Det blir fire etasjar med parkeringsplassar i hallen, med totalt 1.500 plassar. Til samanlikning er Klostergarasjen i Bergen bygd med 950 plassar. Veidekke Entreprenør AS står for bygginga, medan Asplan Viak har prosjektert hallen. Det er dei same aktørane som teikna og bygde Klostergarasjen.

– Hallen under Sartor blir alt i alt svært lik Klostergarasjen, fortel Einarsen.

Både inn- og utkjøring til parkeringshallen skal skje via tilførselstunnelar som kjem opp i krysset ved treningssenteret.

– Også løysinga for inn- og utkjøring blir som i Klostergarasjen, seier Einarsen.

Fjernar frå bakkenivå

Det har vore mykje diskusjon om kor mange parkeringsplassar som trengst på Straume. Det er kommunen som krev at parkeringsplassane skal under bakkenivå før senterområdet kan vidareutviklast. Fylkesmannen har vore kritisk til omfanget av parkeringsplassar og har pålagt kommunen å laga nye forskrifter for dette.

800 av p-plassane i hallen blir erstatning for plassar som forsvinn frå bakkenivå.

– Alle dagens parkeringsplassar forsvinn, bortsett frå 650 plassar ved Obs-en, opplyser Einarsen. Det betyr at også plassane under tak, både ved Ica og ved biblioteket, blir erstatta.

I Straumeplanen er det lagt opp til bygging av 300 bustader i senterområdet. Desse innbyggjarane skal også parkera i hallen.

Hall nummer to på vent

Det finst planar for endå ein parkeringshall under senteret, nord for den som no blir bygd, og dermed nærare bussterminalen.

– Den blir ikkje sprengt ut i denne omgang, seier Einarsen.

Kva som skjer med hall nummer to og kor stor den eventuelt blir, er avhengig av kva kommunen kjem fram til og kva Fylkesmannen vil akseptera.

Hallen som skal byggjast no, skal etter planen stå klar i november 2014. Sjølve sprengningsarbeidet vil ta om lag eitt år. Sartor Holding hadde ikkje bygd eit parkeringsanlegg til 350 millionar kroner om dei ikkje hadde fått pålegg om det.

– Men vi ser jo at det er positivt å få parkeringa bort frå gatenivå, seier Einarsen.

Blir ferdig med sprenging

Det er ikkje så komplisert og fordyrande å sprengja ut ein hall under eksisterande bygg som ein gjerne skulle tru. Einarsen er i alle fall nøgd med løysinga samanlikna med meir konvensjonelle anlegg.

– No gjer vi oss ferdige med sprenginga ein gong for alle. Nye bygg kan etterpå byggjast på flat mark, utan at vi må sprengja ut kjellar til parkering under kvart bygg, forklarar han. Han håpar det vil vera positivt også for naboar.

– Vi sparar kanskje fleire tiår med sprenging, seier han.

Fleire politikarar i Fjell har vore kritiske til at all trafikken må gjennom sentrum for å koma til innkjøringa til hallen i sør.

– Vi må huska på at om lag halvparten av våre handlande kjem frå bysida og buområda i aust. Dei vil ta den nye vegen til Storskaret, som skal vera ferdig i 2014, påpeikar Einarsen.