Landro seier ja til ordførarkjedet

Det var tysdag god stemning i Sund kommune då haustens første kommunstyre vart sparka i gang. Med nyheita om at Ove Trellevik har landa ein sjetteplass på stortingslista til Hordaland Høgre, var det mangt eit smil blant dei folkevalde, enten fordi dei var stolte - eller glad for å bli kvitt Trellevik.

Landro klar

Varaordførar Kari-Anne Landro (H) vil ikkje spekulera i om Trellevik kjem seg på tinget eller ikkje. Men om Høgre-ordføraren i Sund må flytta seg over fjellet og til tigerstaden, så er varaordføraren førebudd på å tre på seg ordførarkjedet på fast basis.

– Eg føler meg i stand til det, ja, men det er langt fram, smiler Landro til Vestnytt.

Ho har skjønt det lenge at Trellevik har hatt politiske ambisjonar, og ho har forstått at viljen til å senda ordføraren til Oslo har vore stor i Hordaland Høgre også.

– Om ordføraren vil dette, så skal han få gjera det, seier Landro.

Ho trur Trellevik vil verta ein styrke i Oslo.

– Eg trur han vil vera seg sjølv der som her. Han er ærlig, ivrig og han er utålmodig, skryt Kari-Anne Landro.

Ho tykkjer det er bra for regionen Høgre om Trellevik kjem seg på Tinget, men trist for Sund Høgre.

Skoge stolt

Gruppeleiar i Sund Høgre, Nils Kåre Skoge, beklager at partiet kan mista ein så dyktig politikar til Oslo.

– Det kviler eit stort ansvar på Sund Høgre om Ove Trellevik forsvinn austover. Me har hatt to store ordførarar i Albrigt og Ove, så me har store sko og fylla om dette vert situasjonen, seier Nils Kåre Skoge.

Men gruppeleiaren er glad for at Sund Høgre med Trellevik på Tinget, har ei stemme rett inn i hjertet av det politiske Noreg.

– Han gløymer nok ikkje kor han kjem i frå, smiler Nils Kåre Skoge lurt.

Synd for Sund

Gruppeleiar for KrF, Beate Husa, tykkjer det er synd for Sund om Trellevik forsvinn frå lokalpolitikken. Men Husa er sikker på at han vil vera ein ypparleg representant i Oslo.

– Eg trur han kjem til å gjera masse for regionen på Tinget, seier Husa.

– Så du er ikkje glad for å kanskje bli kvitt han?

– Hehe, nei, eg er glad i Oven. Han er ein dyktig ordførar, ler Beate Husa.

Vel...

Gruppeleiar Nina Glesnes i Sund Ap kjenner at ho må gratulera sin argaste politiske motstandar i Sund-politikken med sjetteplassen på Høgre-lista. Men ho ber Trellevik «fiksa» litt på retorikken sin.

– Ove Trellevik er ein mann med meiningars mot, men det vil visa seg om han klarer seg blant dei store i rikspolitikken, smiler Nina Glesnes lurt.

Ho er ikkje heilt sikker på at retorikaren Ove Trellevik vil klara seg like godt i Oslo som i Sund

– Retorikken hans held ikkje mål, men eg må jo tru at Erna Solberg har kurs for det, smiler Nina Glesnes.

Endeleg val i oktober

Først gjenstår det å sjå om Hordaland Høgre sine eigne politikarar vil godta at Ove Trellevik og dei andre på nominasjonslista får den plassen som er foreslått. Så står riksvalet for tur i 2013.