Landa avtale med Statoil verd 250 millionar kroner

ÅGOTNES: Sontum Fire & Safety driv med sørvis og vedlikehald av brannutstyr på land og sjøbaserte installasjonar.

I to år har Audun Hellesøy og resten av Ågotnes-firmaet arbeidd intenst med Statoil for å få kontrakten. I fem år skal dei sørga for at brannvernutstyret til det delstatlege oljeselskapet held forskriftsmessige mål.

– Me startar opp 15. mars. Dette er ein rammeavtale, som gjer at me har totalsørvis i heile Statoil på dette feltet, smiler Audun Hellesøy.

Han har all grunn til å smila. Då Vestnytt i fjor sommar skreiv om Sontum, var dei 15 tilsette.

Ein ny avtale betyr mellom 10 og 12 nye årsverk - minst.

– Me har gjort ein kanonjobb. Det er svært morosamt og utruleg tilfredsstillande å sitta her no, seier Hellesøy.

Blir ein av dei store
Audun Hellesøy lova i fjor sommar at han skulle satsa på Ågotnes. Då finanskrisa slo inn over landet, var næringslivet på Ågotnes ikkje skjerma, og mange merka nedgangen på kroppen.

Sontum har kjempa seg gjennom denne krisa, og kan no sjå framover med heva hovud.

– Me har fått til noko som mange store aktørar ikkje har fått til. Me har fått ein rammeavtale på tre år med opsjon på to til, seier Hellesøy.

Kontrakten har ein årleg verdi på kring 40 til 50 millionar kroner.

Styrker posisjonen
Frå før har Sontum kundar som brannvesenet på Ågotnes og forsvaret. No ser dei mot endå større fisk i havet.

– Me har planar om å verta større. Det er mange aktørar der ute, og me har ikkje tenkt å kvila på laurbærblada, gliser Audun Hellesøy.

Han legg til at dei fleste tilsette i bedrifta er frå regionen.

– Me legg vekt på lokal arbeidskraft, seier den daglege leiaren.

Det var spisskompetansen som gjorde at Statoil gjekk for Sontum.

– Me sit på spesialkompetansen på vårt område. No vil me verta endå betre, seier Hellesøy.

Frå i fjor sommar til mars i år har Sontum tilsett åtte personar. Når året er omme, er dei truleg i nærleiken av 30 tilsette.

Jamn auke
Dei siste åra har Sontum Fire & Safety hatt ei omsetning på kring 30 millionar kroner. Den positive vekstkurva har vorte synleg i ein ellers så mørk marknad.

– Eg har ei von om at denne krontrakten kan gje positive ringverknadar for fleire firma på Ågotnes. Me har mange underleverandørar som vil merka at me aukar i volum, seier Hellesøy.

– I fjor sommar sa du at du ikkje tenkjer særleg på den pågåande finansielle verdssituasjonen. Då sa du at om ein satsar, så vinn ein?

– Me vant, gliser Audun Hellesøy før han legg til.

– Eg føler me har gjort det riktig strategisk. Me har vore nøkterne og ikkje tilsett for mange. Me har holdt på dei me har, og dermed og holdt på kvalitane våre, seier han.

Sontum Fire & Safety er eit heileigd dotterselskap av Stavanger-baserte Valco Group