Kan heita Nordre Fjell

ÅGOTNES: – Det har vore eit utruleg engasjement om namnespørsmålet. Det hadde me ikkje venta, seier skulesjef Ellen Hansen i Fjell kommune.

Den nye skulen på Ågotnes treng eit namn, og kommunen har etterlyst forslag. Då fristen gjekk ut denne veka, hadde det kome inn nær 50 forslag.

– Me har fått inn forslag frå enkeltpersonar og i tillegg frå elevråda på Ulveset, Ågotnes, Hjelteryggen, Tellnes og Gangstøgarden, fortel skulesjefen.

Blant forslaga finn ein Steingarden, Skogen, Naturskogen, Tranevågen, Hamramyra (som tomta heiter) og Nordre Fjell ungdomsskule.

– Det har vore ein fantastisk oppslutnad, seier skulesjefen.

Braut tradisjonen
Tidlegare har det vore praksis i Fjell å kalla skulen opp etter området der den ligg. Men administrasjonen har ikkje lagt opp til at nyeskulen skal heita Ågotnes ungdomsskule. Dei viser til at denne tradisjonen vart broten då ein namnga Liljevatnet skule.

– Den låg i utmarka til Arefjord, men borna frå Arefjord skulle ikkje gå der. Difor gjekk me utanfor tradisjonen og ga skulen namn etter vatnet der, seier ho.

Men det er mange som helst vil at skulen skal bli heitande Ågotnes ungdomsskule. Det er danna ei facebook-gruppe til støtte for dette. Samstundes er det og danna ei tilsvarande gruppe for namnet Vindenes ungdomsskule, fordi dei meiner at skulebygget eigentleg ligg på Vindenes.

Det er politikarane i komite for drift som skal bestemma skulenamnet. Anita Leganger, som står bak facebook-gruppa for Ågotnes-namnet, har vorte oppringt av komiteleiar Vidar Arnesen (Frp).

– Han likte dårleg at me har danna ei slik gruppe, og det ga han tydeleg uttrykk for. Men kommunen ba om engasjement, og no har dei fått det, seier Leganger.

Identitet
Vidar Arnesen legg vekt på at det ikkje er lagt opp til ein namnekonkurranse.

– Det fungerer ikkje slik at dei som trommar saman ei gruppe og får mange medlemmer, får bestemma namnet. Det er å kasta blår i augo på dei som engasjerer seg om dei får inntrykk av at det er ein konkurranse, seier han.

Men Anita Leganger viser til at dei er i sin fulle rett til å kjempa for Ågotnes-namnet.

– Me er alle fullt klar over at det ikkje er ein konkurranse. Eg tykkjer det er utruleg at dei kan føla seg trua av dette, seier ho.

Leganger meiner at Ågotnes ungdomsskule er namnet som best fortel kor skulen ligg.

– Då veit ein kor skulen er, og det gjev ein identitet, seier Anita Leganger.