Informerte om busetting av flyktningar

 Informasjons- og mangfaldsdepartementet (IMDI) har sendt ein førespurnad til Øygarden kommune om å ta i mot og busetja flytkningar frå neste år. Talet på flyktningar er 15 personar 2010 og 40 totalt dei tre neste åra.

Onsdag informerte IMDI eit lydhøyrt kommunestyre, som skal ta si avgjerdsle kring denne saka 9. desember.

Kaare-Andreas Krog har arbeidd på bergenskontoret til IMDI sidan byrjinga av 90-talet. Han har vore med på dei to periodane då Hellesøy hadde asylmottak, og han har god røynsle med korleis det gjekk.

– Eg vil definera samarbeidet som ganske vellukka. Øygarden har tradisjon for å ta sin del av den nasjonale oppgåva, seier Krog, som i går informerte kommunestyret i Øygarden om kva det inneber å ta i mot flyktningar som er busettingsklare.

Olav Martin Vik åpna ballet med si positive innstilling til IMDI sin førespurnad.

– Øygarden må kunne klara å ta i mot nokre flyktningar. Me tar sikte på å legga fram denne saka i desembermøtet vårt, sa ordføraren til dei andre representantane i kommunestyret.

Målsettinga for busetting av flyktningar i Noreg i 2010 er 10.000. Dette er i all hovudsak menneske frå Eritrea, Afghanistan, Somalia, dei palestinske områda og Irak. Nokre overføringsflyktningar kan kome frå Bhutan óg.

I tida 1994 til 2001 har det vore busett 52 flyktningar i Øygarden kommune.

– Kommunen får eit integreringstilskot kvart år over fem år. Etter det vert det forventa at dei skal handsamast som vanlege borgarar, fortalte Krog til representantane.

Målet til IMDI er at 65 prosent av flyktningane som kjem til Noreg, skal ut i arbeid eller utdanning. Resultatet for 2007 var 50 prosent og i fjor 53 prosent.

Dei fleste av politikarane var vakne under denne seansen, og fleire kom med spørsmål til saka.