Fryktar katastrofa når vêret tek tak i Sund

5. mars var Sund isolert. Trafikken kollapsa i snøvêret, og riksveg 555 ved Krossleitet var delvis sperra etter at snøen hadde lagt seg tett på vegbanen. Helikopterhadde vore hjelpelaust med det vêret som var den dagen.

Drøfta beredskapen

Det var difor ordførar i Sund, Albrigt Sangolt, kalla inn til rådsmøte med fleire involverte partar torsdag kveld. Samstundes med Sangolt si bøn om førebudd beredskap, så lava det ned utanfor, og ein kunne mest ikkje sjå kor ein var då det snøa som verst.

– Eg ønsker å drøfta beredskap og tiltak for å få på plass ein god plan for tryggleik i situasjonar med ekstremt vêr, sa Albrigt Sangolt til forsamlinga.
Både lensmann og ambulansepersonell møtte opp i vintervêret torsdag kveld for å syna fram si meining kring beredskap i dårleg vêr.

Særs nøgd med oppmøtet

Ordføraren frykta at folk ikkje skulle møta opp for å diskutera eit emne som engasjerer Sangolt i høg grad.
– Eg hadde fått høyra litt på førehand at temaet var litt overdrive, men eg vart letta då eg såg kor mange som kom, seier Sangolt.
Sjølv stod han opp klokka tre natt til fredag og såg snøvêret som dreiv utanfor.

– Det var blitt litt kaldt ute, seier Sangolt som trur høgare makter óg var med då møtet vart planlagt.
– Snøvêret kom som sendt frå himmelen, smiler Albrigt Sangolt.
No skal han få samla representantar frå Fjell kommune, Sund, vegkontoret og lensmannskontoret for å diskutera spesielle tiltak når det gjeld vintervedlikehald på Krossleitet.

– Me kan kanskje få ordne eit ekstra køyretøy frå vegkontoret, som har spesiell fokus på området Krossleitet, seier ordføraren.
I alle høve vil han gjera noko for å trygga innbyggarane i kommunen.

– Me må finna gode løysingar, inntil det nye fastlandssambandet i sør er komen, seier Albrigt alvorleg.

Tek vêret på alvor

Borgny Forland er leiar for besøkstenesta i Sund. Saman med Olaug Kallestad var ho på møtet torsdag. Forland fekk føla tøvêret på kroppen den 5. mars.
– Eg merka det i aller høgaste grad. Eg følgde ein pasient til lækjaren den dagen, og måtte brått organisera drosjen og lækjarbesøket. Me måtte få sjåføren til venta på oss, og me måtte få lækjaren til å ta oss inn med ein gong. Hadde me ikkje fått til det, så hadde me ikkje kome oss heim den dagen, seier Forland.
Ho føler kommunen tek saka svært alvorleg.

– Me fekk utbytte av møtet. Eg føler at kommunen har fokus på saka, og at dei verkeleg tek det på alvor. Men eg skulle først og fremst hatt attende sjukebilen til Sund, seier Borgny Forland.