Frp samla om bru

SOTRASAMBANDET: Det er løysinga med firefelts bru i høgspenttraseen kombinert med tunnel frå brufestet i Drotningsvik til Storavatnet, som Framstegspartiet i region vest, Bergen og Hordaland no samlar seg om.

– Lukkeleg
– Med kryssløysing i fjellet kan også trafikken i Drotningsvik koplast på. Eg er lukkeleg for at også Frp sine folkevalde i Bergen no støttar denne løysinga, seier varaordførar Georg Indrevik i Fjell.

Onsdag ettermiddag kalla fylkestingsgruppa inn til møte om sambandet, ved partiet sitt kontor i Bergen. Spørsmålet er kva alternativ som skal bli med i det vidare arbeidet med kommunedelplanen for Sotrasambandet. Både ordførar Gunnar Bakke og fleire av Frp sine folk i bystyret i Bergen var med på møtet. Til liks med byrådet går Frp inn for at det såkalla konsept F, alternativ C7 (firefelts bru og tunnel) skal greiast ut vidare.

– Det er fantastisk at me no kan vera samde på tvers av kommunegrensene om ein slik høyringsuttale, meiner Indrevik.

Planlegg vidare
Han representerte Fjell Frp i møtet, saman med gruppeleiar Anita Garlid Johannessen. Også Frp er opptekne av at ein på sikt finn løysingar for trafikkveksten frå Storavatnet mot Liavatnet og påkoplinga til Ringveg Vest. Der skal andre byggesteg frå Sandeide til Liavatnet stå klart før Sotrasambandet er ferdig.

– Me ser problema som trafikkveksten vil skapa. Det er avgjerande at planlegginga av løysingar på vestre innfartsåre ikkje stansar med Sotrasambandet, seier Georg Indrevik.

Bein og billig tunnel
Men fleire fryktar at køar og trafikkbelastning ikkje blir løyst med det sambandet som no ligg i løypa. Etter det Vestnytt forstår skal mellom andre Indrevik vera begeistra for eit framlegg frå Ingvald Strømme, ein av grunnleggarane av Sartor Senter på 1970-talet. Han tek til orde for å sprenga ein tunnel på kring ti kilometer, frå vestsida av Kolltveit og vidare under Bildøy, Straume, Knarrevik, Drotningsvik og Lyderhorn, med tunnelutslag ved Liavatnet. Slik meiner han ein kan få ein relativt rimeleg tunnel i så å seia bein linje frå Kolltveit til Liavatnet. Der får ein direkte påkopling til Ringveg Vest og den nye vegen som er under bygging mot Sandsli/Kokstad og Flesland.

– For seint ute
– Eg har bidrege med underlagsmateriale til Strømme. Han har laga eit flott framlegg med fleire gode sider. Problemet er at det kjem så altfor seint, meiner Georg Indrevik.

Fordelane han ser går på kostnader og omsynet til lokalmiljø langs dagens veg. Ikkje minst ville ein sleppa ein fire-felts motorveg tvers gjennom det nye by-området Straume/Bildøyna. Men når samferdselsministeren har gjort det klart at fleire tunnel-utgreiingar er uaktuelt, fryktar varaordføraren i Fjell at eit nytt alternativ no vert bortkasta tid.

– Me må ha som mål å få bygginga av det nye sambandet i gang, helst med start i 2013 og opning kring 2017. Då har me diverre ikkje tid til å gå meir inn i Strømme sitt framlegg, meiner Indrevik.

Han meiner fire-felts bru er beste, moglege løysing for nytt fastlandssamband, men vil likevel jobba for å unngå motorveg gjennom Straume.

– Eg vil jobba for å samla støtte til tunnel frå Arefjord til Kolltveit. På det strekket har me betre tid til å finna løysingar og her er Fjell planmynde åleine, påpeikar varaordføraren.