Frå rektor til skulesjef i Fjell

STRAUME: Anglevik vert med det mannen som tek over stafettpinnen frå Ellen Hansen, skulesjef i Fjell dei siste åtte åra.

– Eg er audmjuk med tanke på den tilliten Fjell kommune no viser meg. Større tillit enn dette kan ein knapt få i kommunal samanheng, seier Wilhelm Anglevik.

Godt grunnlag
Han var ein av 12 søkjarar då stillinga som skulesjef vart ledig. 58-åringen ser mykje godt å byggja vidare på i Fjell-skulen, men også utfordringar i dagens situasjon og for åra som kjem. Anglevik meiner det har både fordelar og ulemper å koma frå rektorkollegiet til jobben som skulesjef.

– Eg kjenner Fjell-skulen gjennom 32 år og tør seia at eg kan skule. Eg veit kvar skoen trykkjer, seier Anglevik.

Han veit kva moglegheiter rektorar og lærarar i Fjell har, samt kvar det buttar mot i høve til falege og sosiale vilkår. Samstundes ser han at det kan by på utfordringar når ein er «avla av standen» og kjenner dei ein skal leia.

– Ein kan dimmast på synet for verkebyllar i systemet. Det er ein risiko eg er klar over, seier Wilhelm Anglevik.

Han vil føra vidare den faglege satsinga på basisfag som norsk og realfag. I tillegg til det faglege legg han stor vekt på å utvikla den sosiale kompetansen hjå elevane.

Felles løft mot mobbing
– Med denne skulesjefen vil Fjell setja inn endå større ressursar mot det me kallar uønska åtferd. I praksis tyder det å førebyggja hærverk og satsa på eit felles løft mot mobbing i Fjell-skulen, seier Anglevik.

Røynsla som rektor på Knappskog har lært han at det fysiske læringsmiljøet har mykje å seia for korleis elevane presterer og trivselen ved skulen. Knappskog skule er bygd ut og rusta opp kraftig dei seinare åra. Slik er det ikkje ved alle skular i Fjell, samstundes som skulen har mål om eit likeverdig pedagogisk tilbod.

– Eit godt, fysisk miljø er ikkje det einaste som betyr noko, men det er ein viktig føresetnad for trivsel og læring, seier Anglevik.

På «nye» Knappskog skule har han praktisk talt ikkje opplevd hærverk. No ønskjer den nye skulesjefen at dei fysiske arbeidsvilkåra ein kan tilby lærarar og elevar vert eit sentralt punkt i debatten om skulestruktur i Fjell. Samstundes meiner Anglevik at han som fersk skulesjef er den siste som bør gje eit tal på kor mange skular Fjell skal ned til frå dei 18 skuleeiningane ein har i dag.

– Det spørsmålet eg stiller er kva me må gjera for å møta dei krava dyktige lærarar stiller for å jobba i Fjell. Samt kva som skal til for å skapa eit godt læringsmiljø prega av trivsel og tryggleik, seier Wilhelm Anglevik.