Fortvilar over upåliteleg tryggleiksalarm

BLOMVÅG: – Eg har hatt bruk for tryggleiksalarmen mange gonger, seier Gerhard R. Andersen.

Han er 82 år gamal og bur heime åleine i Blomvåg. Helsa skrantar, og han er dårleg til beins. Tryggleiksalarmen set han i stand til å bu heime, då han kan tilkalla hjelp i naudsfall. Men då er han avhengig av at tryggleiksalarmen virkar, og det gjer den ikkje alltid.

– Eg har vorte liggjande på golvet utan å oppnå kontakt gjennom alarmen, seier Gerhard.

Fortvila familie
Sonen, John Reidar Andersen, peikar på at problemet ligg i «smykket», som er alarmknappen faren har hengande rundt halsen.

– Det er fleire gonger me har funne far liggjande på golvet fordi alarmen ikkje virkar, seier John Reidar.

Han er fortvila over at dei ikkje kan føla seg trygge på at faren får hjelp når han treng, sidan alarmen kan vera upåliteleg.

– «Smykket» har vist seg innimellom ikkje å fungera. I tillegg er det slik at dersom han har site i telefonen og gløymer å leggja på, sperrer det for alarmen, seier sonen.

Ikkje automatisk testing
Tryggleiksalarmen er todelt. I gangen heng det ein kontrollboks med tovegs kommunikasjon. Så har brukaren ein trådlaus alarmknapp hengande rundt halsen. Kontrollboksen blir automatisk sjekka opp mot alarmsentralen gjennom faste oppringingar kvar 72. time.

– Problemet er at «smykket» ikkje er del av denne automatiske kontrollen. Så når denne delen ikkje funkar, blir det ikkje oppdaga. Me har sagt i frå fleire gonger, men dei tekniske problema har ikkje vorte løyst, seier John Reidar.

 Han uroar seg for tryggleiken til faren, og peikar på at Øygarden har som mål at gamle skal få bu heime så lenge som mogeleg.

– Då nyttar det ikkje å ha ein tryggleiksalarm ein ikkje kan stola på, seier John Reidar Andersen.

Han har sjølv sjekka og fått konstatert at «smykket» ikkje har fungert, og ønskjer at Øygarden får på plass eit system som fungerer betre. Ein alarmknapp dei kan stola på og helst eit system som ikkje er avhengig av at telefonlina er ledig, er ønsket.

Lyn og torden
Gerhard R. Andersen får besøk av heimehjelp med mat fleire gonger dagleg, og får og hjelp frå heimesjukepleie.

– Det som fungerer, fungerer godt. Men alarmen fungerer dårleg. Uvissa rundt alarmen tek på både for far og meg, seier John Reidar.

Han har gjort kommunen merksam på problema, men opplever å ikkje ha fått noko klar løysing på problemet så langt.

Pleie- og omsorgsleiar Britt-Jorun Landro i Øygarden er bortreist, og kan ikkje uttala seg om den konkrete saka.

– Eg er ikkje kjent med at det er problem med andre tryggleiksalarmar i kommunen. Men det er kjent at lyn og torden kan virka inn og slå ut alarmane, seier ho.

Tek tak i saka
Ifølgje Landro er dei generelt nøgde med alarmsystemet. Øygarden sine tryggleiksalarmar er levert av det private helseselskapet Hjelp 24. Når alarmen blir utløyst, blir det oppretta kontakt med Hjelp 24 sin alarmsentral. Så melder dei vidare til Tednebakkane omsorgssenter, som så kan rykkja ut.

Driftsleiar Arvid Bakken i Hjelp 24 seier at problem med alarmknappane ikkje er noko utbreidd.

– Ut frå trafikkdata som me har her, kan me ikkje sjå at det er noko feil på Andersen sitt utstyr. Men om det er ein knapp som ikkje fungerer heilt, byttar me den gjerne ut. Tryggleiksalarmar kan bli slitt på same måte som anna utstyr, seier han.

Hjelp 24 kjem no til å ta tak i saka.

– Her må me finna ut om alarmen har eit problem, og eventuelt byta den. Det er ikkje kjekt for brukar og pårørande å gå rundt og vera usikker på om ting fungerer. Ting skal jo virka, seier Bakken.

Hjelp 24 sine alarmar baserer seg på telefonlinene. Dermed kan det oppstå problem dersom telefonen er opptatt. Men ifølgje Hjelp 24 kan ein ordna det slik at det finst fleire liner, eller at alarmen bryt inn og overstyrer telefonen dersom alarmknappen blir trykt inn.