Føreslår å leggja ned Pollen og Tofterøy skular

SUND: Kommunestyret i Sund fekk tysdag presentert dei tre rapportane dei har bestilt om skulane i kommunen. Planleggjar Terje Gregersen i Norconsult la fram hovudtrekka i rapportane på Nordsjøfartmuseet i Telavåg, der også FAU-representantar frå barneskulane var inviterte.

Pollen og Tofterøy
Bakgrunnen for arbeidet som no er gjort, er eit vedtak i kommunestyret desember 2008. Ap fekk den gongen eit overraskande fleirtal for at Sund skulle starta planlegging for bygging av ein ny, stor skule med plass til 350 elevar.

Etter å ha sett på skulebygga i kommunen, kapasitet og elevtalsutvikling, konkluderer Norconsult med at Sund bør byggja ut Skogsvåg skule i staden for å byggja heilt nytt.

– Skogsvåg skule går for halv maskin i dag. Det er den desidert flottaste skulen i kommunen, og skulen fortener fleire elevar, lærarar og foreldre, meiner Gregersen.

God plass på Skogsvåg
Ifølgje rapporten er det plass til mellom 140 og 160 elevar ved Skogsvåg skule, medan det dette skuleåret berre går 98 elevar ved skulen.

– Skogsvåg skule bør dimensjonerast for 350 elevar, meiner Gregersen. Det vil då bli plass til elevane ved Pollen skule (biletet). Per i dag bur 70 prosent av elevane ved Pollen skule på Hammersland.

– Vår anbefaling er at Pollen skule enten blir nedlagt eller at ein byggjer ny skule, seier Gregersen. Norconsult vurderer Pollen som ein lite føremålstenleg og framtidsretta skulebygning.

– Vi har vurdert tomta ved Skogsvåg skule, og tomta tåler ei skuleutviding som gir plass til totalt 350 elevar, seier Gregersen.

Byggja ut Stranda skule
Men det aller første kommunen blir anbefalt å gjera, er å byggja ut Stranda skule. Den tilrådinga er i tråd med planane som kommunen alt har.

På Stranda skule går det no 130 elevar, medan det eigentleg berre er plass til mellom 100 og 120. Alt til hausten passerer elevtalet 150 på Stranda. Ifølgje rapporten er netto læringsareal per elev på skulen berre 5,7 kvadratmeter i dag.

– Eit netto læringsareal på mindre enn seks kvadratmeter per elev blir rekna for å vera veldig lite, kommenterer Gregersen.

For dyrt med tre skular
Når Stranda skule uansett må utvidast, meiner Norconsult at elevane på Tofterøy bør flyttast over dit. På Tofterøy går det i dag 35 elevar.

Norconsult meiner det sentraliserte alternativet som blei vurdert i ein skulerapport frå 2006, også ville vera ei tenleg og framtidsretta løysing. Denne modellen inneber bygging av ny skule i Spildepollen, samt utviding ved Stranda og Skogsvåg skular. Då vil Tofterøy, Sund, Glesnes og Telavåg skular bli nedlagt.

Men denne løysinga vil bli svært kostbar, og elevar ved fem av dagens skular må få nytt skuleareal. Konsulentane går difor ikkje inn for denne modellen.

Stranda kjem først
Den tilrådde utvidinga ved Skogsvåg vil kosta om lag 72 millionar kroner. Utvidinga ved Stranda skule vil kosta mellom 55 og 68 millionar kroner, alt etter om ein også byggjer gymnastikkanlegg.

Det kom få politiske signal og reaksjonar på rapporten på tysdag. Det som er kjent frå før, er at Ap, KrF og Frp er positive til å endra dagens skulestruktur, medan Høgre er delt i spørsmålet.

– Det som skjer vidare no, er at saksgruppe for levekår og nærmiljø går i gang med å sjå på Stranda skule, der det hastar mest. Så får vi ta oss tid til å vurdera innhaldet i rapportane, meiner ordførar Albrigt Sangolt.   

Kommuneval neste år
Kommunalsjef Jon Erik Egeland i Sund meiner skulestrukturen og løysingane som blir anbefalte, er moderate og balanserte.

– Eg trur tidspunktet er gunstig for å diskutera skulestruktur. Til neste år er det kommuneval, og partia får no god tid til å innarbeida standpunkta sine i partiprogramma, seier Jon Erik Egeland.