Føler seg pressa ut av Tremorkirken fordi ho er sambuar

STRAUME: – Eg vart offisielt sambuar i juni, men eg har eigentleg vore sambuar i ti månader, fortel Ina Marie Jensen Sewe til Vestnytt.

Då pastoren Willy Landro i Tremorkirken fekk vita om hennar private situasjon, fekk ho beskjed om at ho vart fritatt frå alle verv i det kristelege samfunnet.

– Eg føler meg kasta ut av Tremorkirken, seier 21-åringen.

Singel då ho vart med
I 2005 hadde Ina Marie Jensen Sewe sitt første møte med Tremorkirken. Sidan den gongen har kyrkjelyden vore ein viktig del av hennar liv.

Sambuar Erling Gursli har óg vorte ein viktig del av livet til 21-åringen, og sidan juni har dei vore registrerte sambuarar.

– Me budde på kvar side av landet då me traff kvarandre, men det enda med at eg var mest hjå han. Til slutt bestemte me oss for å verta sambuarar, og han fekk seg jobb her, seier Jensen Sewe.

Ho har vore medlem i lovsangtimen, Tremorkirka sitt kor, ei god stund.

– Leiaren i lovsangtimen visste at eg skulle verta sambuar, og han sa at sambuarskap er eit vanskeleg tema, særskilt når ein skal vera eit forbilde, fortel Ina Marie Jensen Sewe.

Ho forstår ikkje heilt kvifor det skal vera eit problem å vera forbilde og sambuar.

– Willy Landro gav meg beskjed om at eg vart tatt frå alle offentlege tenester i kyrkjelyden, seier Jensen Sewe.

– Vart du kasta ut av Tremorkirken?

– Eg føler meg kasta ut på den måten eg vart behandla, seier 21-åringen.

Det var i førre veke at ho fekk beskjed om at ho ikkje kunne ha ei framtredande rolle i kyrkjelyden.

– Middelaldersk
Jensen Sewe reagerer på at ein i 2010 ekskluderer sambuarar frå verv i kyrkjelyden.

– Dette er ikkje 1600-talet, seier ho.

– Kvifor står du fram?

– Eg er sabla irritert over korleis eg er behandla, og eg vil gjerne at slike middelalderske tankar skal koma ut, seier Jensen Sewe ærleg.

No kjem ho til å halda seg i Fjell kyrkje i framtida.

– Der føler eg meg velkomen.

Barnslig
Ho meiner Tremorkyrkja si leiing oppfører seg barnslig.

– Eg vil ikkje attende til ein kyrkjelyd som fortel at eg ikkje kan ha verv sidan eg er sambuar, men som samstundes ynskjer meg attende når eg er formelt gift. Eg er skvist ut av eit kristent samfunn eg følte meg heime i. Det er ingen god kjensle, seier Ina Marie Jensen Sewe.

Stadig debatt om temaet

Eivind Algrøy er leiar av tilsynsrådet i Tremorkirken. Han kjenner til saka med Ina Marie Jensen Sewe.

– Me har ein prosess gåande hjå oss der me ser på korleis me som kristen kyrkjelyd skal halda fast på det som vår tru seier om ekteskap. Dette er ei vanskeleg sak for oss, og det er ikkje lett å stå for eit klassisk syn og samstundes ta vare på menneska i kyrkjelyden vår, seier Algrøy til Vestnytt.

– Komplisert
Hovudpastor Willy Landro kjenner godt til Ina Marie Jensen Sewe.

– Me har retningsliner for livet i kyrkjelyden, og for dei som står fram for Tremorkirken. Dette er etiske retningsliner. Eg vil ikkje kommentera hennar sak i avisa, men eg vil gje uttrykk for kva Tremorkirken står for. Det er veldig vanskelig å kommunisera dette ut til Vestnytt sine lesarar og folket på Sotra. Me har Bibelen som rettesnor, og for oss vert denne debatten kring grensesetting. Me har sagt at alle er hjarteleg velkomen i Tremorkirken, men me set visse kriterium for dei som skal vera i leiarfunksjonar, seier Willy Landro til Vestnytt.

Han legg vekt på at Tremorkirken ikkje nyttar seg av ei kald norm som kun følger Bibelen, men brukar den som ei rettesnor.

– Utfordringa vår er å kommunisera tenkninga vår at me har Bibelen som rettesnor, og at me kan opplevast som ukjærlige. Det er ei kjempeutfordring for oss, men me er ikkje ekskluderande, men inkluderande, seier Willy Landro før han legg til:

– Me trur at Gud sin gode ordning med ekteskap er det beste.