- Firefelts bru for dyrt og tidkrevjande

SOTRASAMBANDET: Trellevik viser til at ei firefelts bru i høgspenttraseen, som Fjell og vegvesenet har gått inn for, fort kan kosta så mykje at det knapt vert løyseleg for alle som skal betala bompengar. Det må også folk i Sund og Øygarden gjera, sjølv om det er politikarane i Fjell og Bergen som snart skal i gang med vedtak om kommunedelplanar.

– Den store brua kan fort kosta oss mellom åtte og ti milliardar kroner, alt etter kven som tek rekninga for å legga høgspenten i kabel. Ingen veit kor lang tid det tek, og ein risikerer 70 kroner i bompengar berre for å løysa Kolltveit-Liavatnet, hevdar Ove Trellevik.

Sund-pakken
Han fryktar at det å tvihalda på ny, firefelts bru i høgspenten kan bli øydeleggjande for heile regionen. Nye tiår med kø kan bli resultatet. Som eit betre, raskare og rimelegare alternativ kjem ordføraren med det han på bloggen sin kallar Sund-pakken;

* Ei ny Sotrabru på to felt parallelt med eksisterande bru, med plass til syklistar og fotgjengarar. Brua kan bli dimensjonert for framtidig bybane.

* Nye 2 + felt og sykkelvegar frå Kolltveit i vest til Storavatnet i aust.

* Opprusting av dei dårlegaste vegstrekningane nord og sør for Kolltveitkrysset.

* Prosjektet kan realiserast mykje fortare enn løysinga med ny firefelts bru i høgspenttraseen.

* Ei løysing som gjer framtidig fastlandssamband sør på Sotra mot Bergen/Flesland realistisk på litt lengre sikt.

Pakken er basert på kommunestyret i Sund sine tidlegare vedtak, samt ein analyse Ove Trellevik deler med dei fleste som står i kø.

– Kapasiteten på vestre innfartsåre Sotra – Bergen er sprengt. Det er dagleg lange køar og næringslivet lir store tap grunna den dårlige trafikkavviklinga. Difor er det viktig å finna konseptet som snarast løyser dagens trafikkutfordringar, seier Ove Trellevik.

Stein på stein

Han meiner at Bergen kommune allereie er godt i gang, ved at dei har fått regulert og finansiert kollektivfelt i Drotningsvik. Viss Fjell får gjort tilsvarande jobb mellom Straume og Sotrabrua, meiner Trellevik at regionen har starten på eit konsept som kan løysa køane i minst eit par tiår framover.

– Då kan me bygga vidare på det som er i gang, med ei ny, tofelts bru. Det vil gje kollektivfelt, gang og sykkelveg, 2+løysing for bilane og brua kan byggast slik at ho er sterk nok for ei eventuell bybane i framtida, seier Ove Trellevik.

Han har merka seg byrådet i Bergen sitt vedtak om planprogram rett før jul og meiner «Sund-pakken» svarar best også på Bergen sine utfordringar. Trellevik viser til at Bergen har 2+ løysing på søre innfartsåre (Flyplassvegen) og at bypolitikarane satsar på slike løysingar også på andre innfartsårer til Bergen.

– To felt i kvar retning, der det eine er for kollektiv og dei som er to og fleire i bilen, bør halda også frå vest. Eg skjønar godt at Bergen ikkje vil ha seks felt inn på Storavatnet med alt det kan bety av trafikkaos, seier Sund-ordførar Ove Trellevik.