Fiksar gamlebrua

STRAUMSUNDET: Gamlebrua har rust i stålfagverket og store sprekker i betongen. I ein kontroll i 2010 konkluderte Safe Control med at rehabilitering av brua burde gjerast innan få år, ellers kunne bereevna bli svekka ytterlegare. Dessutan kan reparasjonane bli dyrare jo lenger ein ventar med å fiksa brua. Bussar køyrer over denne brua, og ved trafikkuhell på den sterkt trafikkerte riksveg 555 blir gamlebrua omkøyringsveg.

Tysdag vedtok komite for finans og forvalting i Fjell kommune at ein no skal fiksa brua. Jobben skal ut på anbod.

Kommunestyret har sett av to millionar kroner kvart år dei næraste åra til rehabilitering av vegar. I tillegg til å fiksa brua, vedtok komiteen at ein skal leggja ny asfalt på fleire vegar. Dette gjeld Smålonane, Vassvikvegen og Naustvikvegen. Dessutan skal ein leggja ny asfalt på deler av idrettsvegen på Straume. Denne er i dårleg stand mellom anna på grunn av stor anleggstrafikk i samband med bygging av den nye fleirbrukshallen. Når hallen er ferdig, er planen å leggja nytt asfaltlag på heile idrettsvegen.

Komiteen vedtok også å bruka pengar på å gjera plass til nokre fleire bilar på parkeringsplassen ved Fjell ungdomsskule. Dei viser til at slik forholda er i dag, fører det til trafikkfarleg parkering.

(Arkivfoto: Marit Kalgraf)